नेपाल प्रेस युनियन पर्वतको सातौ अधिवेशनले नेतृत्वमा पत्रकार महिलालाई जिम्मेवारी सुम्पिएको छ । प्रेस युनियन पर्वतको आइतवार कुश्मामा सम्पन्न भएको अधिवेशनबाट अध्यक्षमा विष्णु गौतम सर्वसम्मत चयन हुनुभएको हो ।
विगत लामोसमयदेखि जिल्लाको पत्रकारिता क्षेत्रमा क्रियाशील रहदै आउनुभएकी पत्रकार गौतमले रेडियो दिदीवैनीबाट पत्रकारिता क्षेत्रमा प्रवेश गर्नुभएको हो । वि.संं.२०६६ तिरबाट रेडियो दिदीवैनीमा जोडिनु भएकी गौतमले केही वर्ष स्थानीय कालीगण्डकी टेलिभिजनमा समाचार बाचिका साथै कार्यक्रम प्रस्तोताको रुपमा आफूलाई सक्रिय बनाउनु भएको थियो ।
पे्रस युनियन पर्वतको अध्यक्ष चयन हुनुभएकी पत्रकार गौतमले नेपाली पत्रकारिताले सामना गर्नु परेको विभिन्न चुनौती र समस्याबाट पार पाउन अब जनताको पीरमर्कालाई नै समाचारको केन्द्रविन्दु बनाएर हिड्नु पर्नेमा जोड दिनुभयो । जनताको वास्तविक पीडा र कठिनाईलाई कलमले बोक्न सके मात्रै पत्रकारिता क्षेत्रको अस्तित्व जोगिन सक्छ भन्ने विचार पत्रकार गौतमको छ ।
संचार सम्वद्ध संस्था संचारिका समूह पर्वतको अध्यक्ष तथा प्रेस युनियन पर्वतकी उपाध्यक्ष रहिसक्नु भएकी पत्रकार गौतम हाल आफैले संचालन गरेको धौलागिरि मिडिया अनलाइनमा कार्यरत हुनुहुन्छ । प्रेस युनियन पर्वतको अध्यक्षमा पुरा तीन वर्षे अवधिका लागि चयन हुनुहुने पत्रकार गौतम पहिलो महिला पनि हो । यसअघि युनियनको पाँचौ जिल्ला अधिवेशनबाट प्रेस युनियन पर्वतको अध्यक्षमा महिला पत्रकार माया अधिकारी चयन भए पनि अवधि करीव डेढ वर्ष मात्रै थियो । पाँचौ अधिवेशनमा अध्यक्षका उम्मेदवारहरु उत्तम अधिकारी र माया अधिकारी विच प्रतिस्पर्धा हुँदा बराबर मत आएपछि गोला प्रथाबाट चयन गरी आलोपालो जिम्मेवारी दिइएको थियो ।
अध्यक्ष गौतमको नेतृत्वमा ११ सदस्ययीय कार्यसमिति गठन गरिएको जनाइएको छ । समितिमा उपाध्यक्षमा योगराज गिरी बद्री र इन्दिरा शर्मा, सचिव मुनाकुमारी खत्री लामिछाने, कोषाध्यक्ष पुजा शर्मा, सहसचिव मीना पराजुली त्यसैगरी सदस्यहरुमा बसन्त बास्तोला, अस्मिता गौतम, सुरेश रेग्मी, सन्तोष पराजुली, खिममाया पाइजा गिरी रहेका छन् ।