पर्वत जिल्लाको कुश्मा नगरपालिकास्थित ऐतिहासिक तथा धार्मिक महत्त्वको दुर्लुङकोटमा एक लाख पुरस्कार राशीको खुला म्याराथन प्रतियोगिता हुने भएको छ । दुर्लुङकोट म्याराथन समाजको आयोजनामा आगामी असोज ३१ गते दुर्लुङकोट गाउँमा पहिलोपटक प्रतियोगिता हुन लागेको हो ।
आयोजक म्याराथन समाजका अध्यक्ष भिम बहादुर गुरुङका अनुसार दुर्लुङकोट क्षेत्रको पर्यटन प्रवद्र्धन, खेलकुदको विकास तथा स्थानीय युवाहरूलाई खेलकुदमा आकर्षित गर्ने लक्ष्य सहित प्रतियोगिताको आयोजना गर्न लागिएको हो । पर्वतकै मोदीगाउँपालिकामा पर्ने पातीचौरबाट सुरु हुने म्याराथन प्रतियोगिताको मार्गमा विभिन्न धार्मिक तथा पर्यटकीय स्थललाई समेटिएको आयोजकको भनाइ छ ।
समाजका सचिव भिम प्रसाद शर्माका अनुसार पातीचौरबाट सुरु हुने म्याराथन प्रतियोगिताको मार्ग भ्याप्ले, अम्बोट, परादी, चुवा, खरेहा हुँदै दुर्लुङचोक रहेको छ भने दुर्लुङचोकदेखि गोदाम, सल्यान, देउराली र कोेटथर हुँदै कोटगाउँ पुगेर सम्पन्न हुन्छ । हाल्फ म्याराथन प्रतियोगिता सम्पन्न हुँदासम्म सहभागीहरूले २९ किलोमिटरको पैदलयात्रा पूरा गर्ने छन् ।
आयोजकका अनुसार प्रतियोगितामा प्रथम हुनेले एक लाख रुपैयाँ, द्धितीयले ६० हजार रुपैयाँ, तृतीयले ४० हजार रुपैयाँ, सान्त्वना हुने दुई जनाले २०–२० हजार रुपैयाँ र पाँचौ हुनेले १० हजार रुपैयाँ पुरस्कार प्राप्त गर्नेछन् । उत्कृष्ट खेलाडीलाई ट्रफीसहित प्रमाणपत्र प्रदान गरिने आयोजकले जनाएको छ । प्रतियोगितामा सहभागी हुन असोज २३ गतेसम्म नाम दर्ता गर्न सकिने उल्लेख गरेको भएपनि आयोजकले समयावधि बढाएर २८ गतेसम्म नाम दर्ता गर्न सकिने बताएको छ ।
नाम दर्ता शुल्क एक हजार रुपैयाँ तोकिएको प्रतियोगितामा हालसम्म ३० जना बढीले नाम दर्ता गरिसकेका छन् भने सम्पर्कमा धेरै आएको आयोजकको भनाइ छ । आयोजकका अनुसार कम्तीमा पनि एक सय प्रतियोगीले प्रतियोगितामा सहभागीता जनाउने विश्वास लिइएको छ ।