नेपाल यातायात व्यवसायी राष्ट्रीय महासंघका अध्यक्ष पुण्यप्रसाद सिटौलाले दसैका बेला महिलालाई चालकको छेउमा रहेको क्याबिनमा बस्ने गरी टिकट नदिन यातायात व्यवसायीलाई आग्रह गर्नुभएको छ ।
दसैंमा यात्रुको चाप बढ्ने र टिकट अभाव हुन सक्ने अवस्थालाई ध्यान दिँदै महिलालाई चालकको छेउको क्याबिनमा यात्रा गराउने गरी टिकट बिक्री नगर्न उहाँले व्यवसायीलाई आग्रह गर्नुभएको हो । अध्यक्ष सिटौलाले चाडपर्वका समयमा यात्रुको सुरक्षालाई पहिलो प्राथमिकतामा राखेर यातायात सेवा सञ्चालन गर्नुपर्ने बताउनुभयो । सिटौलाले यात्रुलाई सहज र सुरक्षित रूपमा गन्तव्यसम्म पुर्‍याउन व्ववसायी, चालक तथा सहचालक जिम्मेवार बन्नुपर्नेमा जोड दिनुभयो ।
यातायात व्यवसायीले अध्यक्ष सिटौलाको आग्रहलाई स्वीकार गरेमा महिलाहरू खागरी सार्वजनिक बस चालकको छेउको क्याविन सिटमा बसेर यात्रा गर्न पाउने छैनन् । अध्यक्ष सिटौलाको आग्रहलाई महिला अधिकारकर्मीले कसरी लिने हुन् यो भने हेर्न बाँकी छ ।
दसैंको समयमा खासगरी काठमाडौं, भैरहवा, नेपालगंज, बुटवल, नारायणगढ, पोखरा लगायत ठूला शहरबाट गाउँघर फर्कने सर्वसाधारणको घुँइचो लाग्छ । सर्वसाधारण गाउँघर फर्केसँगै शहरबजार क्षेत्र चाडवाडको बेला सुनसान जस्तै देखिन्छन् ।
चाडवाडको बेला सवारीसाधनमा हुने अत्यधिक भीडलाई व्यवस्थित गर्न थप सवारीसाधन सञ्चालन, यात्रुको क्षमताअनुसार मात्र यात्रु राख्ने र चालकलाई आरामको उचित व्यवस्था गर्न समेत महासंघले व्यवसायीलाई आग्रह गरेको छ ।
चाडवाडको बेला यात्रा गर्ने सर्वसाधारण यात्रुहरूले महंगोमा टिकट खरीद गर्नुपर्ने, यात्रामा घुँइचो हुँदा असहजता व्यहोर्नुपर्ने, अत्यधिक भिडले दुर्घटनाको खतरा रहने जस्ता समस्या झेल्दै आउनु परेको गुनासो आउने गरेको छ ।