बाढी तथा प्राकृतिक विपदबाट प्रभावित नागरिकको राहत तथा उद्धारका लागि सामाजिक अभियन्ता एवं शैक्षिक परामर्श व्यवसायी दिपक भण्डारीले एक लाख रुपैयाँ सहयोग प्रदान गर्नु भएको छ । भण्डारीले विपदको समयमा प्रभावित नागरिकलाई तत्काल राहत तथा उद्धारमा सहयोग पुगोस् भन्ने उद्देश्यले प्रधानमन्त्री राहत कोषमा रकम प्रदान गरेका हुन् ।
रसुवाको भोटेकोशी नदीमा आएको विनाशकारी बाढीले ठूलो मानवीय तथा भौतिक क्षति पु¥याएको छ । बाढीमा परी ठूलो संख्यामा मानिसको मृत्यु भएको छ भने हजारौ अझै सम्पर्कविहीन छन् । विपद्का बेला पीडित नागरिकलाई सहयोग गर्नु सबैको सामाजिक दायित्व भएको भण्डारीको भनाई छ । भण्डारी जस्तै स्वदेश तथा विदेशमा रहेका सहयोगी मनहरुले बाढी पीडितका लागि सक्दो आर्थिक र भौतिक सहयोग गरिरहेका छन् ।
पर्वत कुश्मा ६ का स्थायी बासिन्दा भण्डारी विगत लामो समयदेखि काठमाडौंलाई कर्मथलो बनाउदै सामाजिक तथा युवा क्षेत्रमा सक्रिय रहँदै आउनुभएको छ । सन् २०१७ मा काठमाडौं जेसिजको अध्यक्ष भइसकेका भण्डारी जेसिआइ सिनेटर तथा लाइफ टाइम सदस्य समेत हुनुहुन्छ । भण्डारी सन् २०१८ मा किवानिस क्लव काठमाडौंका अध्यक्ष तथा सन् २०१७ मा लायन्स क्लव नेपाल युथका अध्यक्षको जिम्मेवारीमा समेत रहेर काम गरिसकेको व्यक्ति हो ।
शैक्षिक क्षेत्रमा समेत सक्रिय भण्डारी नेपाल जापान काउन्सिलिङ सेन्टरका संचालक तथा प्रमुख कार्यकारी अधिकृत रुपमा कार्यरत हुनुहुन्छ । भण्डारी टाइम्स इन्टरनेशनल कलेजको संचालक समितिमा समेत आवद्ध हुनुहुन्छ ।
विभिन्न सामाजिक तथा संस्थागत जिम्मेवारीमा रहेर काम गर्दै आएका भण्डारीले विपद समयमा आफूसहित संस्थाको तर्फबाट सक्दो सहयोग गर्ने उद्देश्यले राहत तथा उद्धारका लागि एक लाख रुपैयाँ सहयोग गरेको बताउनुभयो । विपदमा परेका नागरिकको पीडामा मलमपट्टि लगाउन भण्डारीले सवैलाई आफूले सक्दो सहयोग गर्न आग्रह समेत गर्नुभयो ।
बुधबार १० गते आएको आकस्मिक बाढीले रसुवाको नेपाल–चीन सीमा क्षेत्रदेखि भोटेकोशी नदी आसपासका बस्ती, सडक, दर्जनौ पुल, जलविद्युत् आयोजना तथा व्यापारिक संरचनामा ठूलो क्षति पु¥याएको छ । बाढीका कारण टिमुरे, रसुवागढी, स्याफ्रुबेसी लगायतका क्षेत्रमा जनजीवन नराम्ररी प्रभावित भएको छ ।