चालीस वर्ष मुन्तिरका युवा संगठित पर्वत जेसीजले स्थापना कालदेखि यता पहिलो पटक सवैभन्दा ठूलो राशीको खुल्ला सेभेन ए साइड फुटबल प्रतियोगिताको आयोजना गर्दैछ । प्रतियोगिता आयोजकले जिल्लाको पर्यटन प्रवद्र्धनमा टेवा पुराई आर्थिक क्षेत्रलाई चलायमान गराउने विश्वास लिएको छ ।
जिल्लाको सदरमुकाम कुश्मा बजारमा भोलि भदौ ५ देखि ७ गतेसम्म आयोजना हुने फूटबल प्रतियोगिताको प्रथम पुरस्कार राशी एक लाख एक हजार एक सय ११ रुपैयाँ घोषणा गरिएको छ भने दोस्रो हुने टिमले ५१ हजार एक सय ११ रुपैयाँ प्राप्त गर्ने छ । प्रतियोगितामा प्रत्येक खेलमा म्यान अफ दी म्याच घोषणा गरिने, सवैभन्दा बढी गोल गर्ने खेलाडी, प्लेयर अफ द टुर्नामेन्ट, वेस्ट किपर, वेस्ट डिफेन्डर र वेस्ट मिडफिल्डरलाई कुश्मामा रहेको साहसिक खेल जीपलाइनमा साहसिक खेलको अवसर दिइने आयोजक संस्था जेसीजले जनाएको छ ।
फूटबल प्रतियोगिताको पुरस्कार राशीका लागि जेसीजका सदस्य, स्थानीय व्यवसायी साथै स्वदेश तथा विदेशमा रहनु भएका खेलकुदप्रेमी शुभेच्छुक व्यक्तित्वहरुले सहयोग गरेका छन् । फूटबल प्रतियोगिताको आयोजना कुश्मानगरपालिकास्थित वडा ५ मा रहेको बडागाउँचौरमा हुने आयोजकको भनाई छ । आयोजकका अनुसार खेलकुद प्रतियोगिताका लागि ५ लाख खर्च हुनेछ भने प्रतियोगिता अवधिभर कम्तिमा पनि २५ लाख बराबरको आर्थिक गतिविधि हुने आंकलन छ ।
पर्वत जेसीज अध्यक्षीय क्लबका अध्यक्ष निर्मल विश्वकर्माले आर्थिक मन्दीले जिल्लाको व्यापारव्यवसायलाई असर पुराइ रहेको अवस्थामा फूटबल प्रतियोगिताले केही भए पनि बजारलाई चलायमान बनाउने विश्वास व्यक्त गर्नुभयो । राष्ट्रियस्तरको खेलकुद प्रतियोगिताले जिल्लाको पर्यटन प्रवद्र्धनमा सहयोग पुग्ने पर्वत जेसीजका अध्यक्ष अच्युत पौडेलको दाबी छ । पत्रकार महासंघ पर्वतका अध्यक्ष लक्ष्मण सापकोटाले खेलकुदको आयोजक पर्वत जेसीज भए पनि खेलकुदले पर्यटन प्रवद्र्धन मार्फत् सिंगो जिल्लाको आर्थिक गतिविधिमा टेवा पुराउने हुँदा सवै पक्षले प्रतियोगितालाई सफल बनाउ साथ र सहयोग गर्नुपर्ने धारणा राख्नुभयो ।
फुटबल प्रतियोगितामा मुलुकभरबाट २० भन्दा बढी टिमले सहभागीता जनाउने पर्वत जेसीजका महासचिव प्रवेशराज पुरीको भनाई छ ।