पर्वतको सदरमुकाम कुश्मा बजारमा तीन दिने हिमालयन सिद्धमहायोग ध्यान साधना शिविरको आयोजना शनिवारदेखि हुँदैछ । समाजमा दिगो शान्ति स्थापित गर्नका लागि ध्यान साधना शिविरको आयोजना गर्न लागेको आयोजकले जनाएको छ ।
समाजमा व्याप्त भ्रष्टचार, आर्थिक अनियमितता, महंगी, बढ्दो राजनीतिक अस्थितरता र बेरोजगारी लगायतका कारण मानिसको आन्तरिक मन अशान्त छ । आधुनिकताको नाममा बढ्दो देखासिकीले मानिसलाई मानसिक रुपमा समेत अस्थिर बनाइरहेको छ । मानसिक स्वास्थ्यको समस्यालाई खासगरी युवापुस्तालाई गाँजेको अवस्थामा योग र ध्यानको महत्व दिनप्रतिदिन बढ्दै गएको अवस्थामा जिल्लामा ध्यान शिविर हुनु सुखद कुरा मानिएको छ ।
महायोगी सिद्धवावा आध्यात्मिक प्रतिष्ठान नेपाल जिल्ला शाखाले शनिवारदेखि आयोजना गर्न लागेको तीन दिने शिविरमा सिद्धमहायोग ध्यान साधना, सद्गुरुबाट कुण्डलिनि जागरण, शक्तिपात तथा भगवान रामको बारेमा सत्संगको कार्यक्रम रहेको छ । आयोजकका अनुसार अनन्तश्री विभूषित जगतगुरु श्री रामानन्दाचार्य स्वामी श्री रामकृष्णाचार्यले ध्यान शिविरमा प्रशिक्षण गर्नुहुनेछ ।
जिल्ला शाखा तथा ध्यान साधना शिविरका सल्लाहकार एवं कार्यक्रम संयोजक विश्व प्रकाश प्रसाईले समाजमा भौतिक विकास मात्रले मानिसलाई मानसिक शान्ति दिन नसक्ने बताउँदै मनमा शान्ति र तनमा सुखबोध गर्न आध्यात्मिक चिन्तन, सनातन संस्कार र कर्म वियोगी व्यवहारको आवश्यकता रहेको बताउनुभयो ।
संस्थाका जिल्ला अध्यक्ष राम प्रसाद पराजुलीका अनुसार तीन दिने ध्यान शिविरमा साधनाका लागि श्रद्धालु तथा भक्तजनलाई कुनै शुल्क लाग्ने छैन । अध्यक्ष पराजुलीले भन्नुभयो–ूध्यान शिविर संचालनका लागि धेरै ठुलो खर्च छैन । साधकका लागि सात्विक भण्डाराको व्यवस्था गरिदा खर्च लाग्ने भएको हो । खर्चको व्यवस्था भक्तजनको स्वेच्छिक सेवाबाट नै हुनेछ ।ू अध्यक्ष पराजुलीका अनुसार तीन दिने शिविरमा एक हजार पाँच सय जना भक्तजनले सत्संग गर्ने छन् भने ५ सय जनाले साधना गर्ने छन् ।