पर्वत जिल्लास्थित प्रदेश अस्पताल कुश्मालाई सौन्दर्यकरण गरी बेहुली जस्तै सिंगारिएको छ । अस्पताल छिरेसँगै जोकोही सेवाग्राहिले आफू अस्पताल नभई कतै सुन्दर बगैचामा प्रवेश गर्दैछु कि भन्ने अनुभूति गर्दछन् ।

अस्पतालको गेटसँगै देव्रे साइटमा रहेको पुरानो मौलिक कलाकृतिले बनेको ढुंगे धाराबाट झरिरहेको पानी देख्दा मान्छेको मनमा आनन्दी मिल्छ । कुनैबेला पिउने पानीको समस्या झेलिरहेको अस्पतालमा ढुंगेधाराबाट निरन्तर पानी बगिरहेको देख्दा सर्वसाधारण सेवाग्राही अचम्मित छन् । अन्तराष्ट्रिय पर्वत समाजद्धारा पर्वत अस्पतालको सौन्दर्यकरण परियोजना सम्पन्न गरेपछि अस्पतालले सौन्दर्यता पाएको हो ।

परियोजनाका परिकल्पनाकार रहनु भएका अस्पतालका निवर्तमान अध्यक्ष शंकर गिरीका अनुसार अस्पताल परिसरलाई आकर्षक, सफा र व्यवस्थित बनाउने उद्देश्यले हरियाली प्रवद्र्धन, रंगरोगन तथा भौतिक संरचनामा सुधार गरिएको छ । अस्पताल परिसरभित्र फूलबारी निर्माण, पार्किङ व्यवस्थापन, पैदलमार्ग मर्मत तथा निर्माण, चौतारी निर्माण, पर्खाल र भवनमा नयाँ रंग लगाउने काम सम्पन्न भएको छ । सौन्दर्यकरण परियोजनाको परिकल्पना गरी सफल बनाउन इमान्दारितासाथ खटेर लागेको भनी ग्लोबल समाज पर्वतले निवर्तमान अध्यक्ष गिरीलाई सम्मान समेत गरेको थियो ।

अस्पताल हाताभित्रको जिर्ण मन्दिरको पुनःनिर्माण गरिएको छ भने बुद्धको मूर्तिले अस्पताल हातालाई आध्यात्मिक माहौलको सृजना गरेको छ । बिरामी तथा कुरुवाका लागि बस्ने ठाउँ व्यवस्थित गरिएको छ भने सरसफाइमा विशेष ध्यान दिइएको छ । सौन्दर्यकरणले सेवाग्राहीलाई सहज र मानसिक रुपमा सकारात्मक वातावरण प्रदान गरेको छ ।

अस्पतालका मेसु डाक्टर ढुण्डीराज पौडेल भन्नुहुन्छ–सरकारी लगानी विना नै समुदायस्तरको आर्थिक सहयोगबाट अस्पताल परिसरमा स्वच्छ र सुन्दर वातावरण हुनु प्रशंसनीय कार्य हो । पहिले वर्षात्को समयमा हिलो र हिउँदमा धुलाम्मे हुने अस्पताल परिसर अहिले एकदमै व्यवस्थित बनेको छ । स्वास्थ्य सेवा लिन आउने बिरामीलाई स्वच्छ र शान्त वातावरण आवश्यक हुन्छ त्यसैले सौन्दर्यकरणलाई प्राथमिकतामा राखिएको पर्वत अस्पताल सौन्दर्यकरण परियोजनाका संयोजक पुरन गिरीको भनाई छ ।

सौन्दर्यकरण परियोजनाका लागि आर्थिक रकम संकलन गर्न सहयोग पुराएको बेल्जीयम च्यारिटी कार्यक्रम संयोजक झलक केसीका अनुसार परियोजनाका लागि ४२ लाख रुपैया खर्च भएको छ । परियोजनाका लागि नेपाल संयोजक मुना भुषाल, सदस्य सचिव कमल लामिछाने, आर्थिक संकलन संयोजक कृष्ण तिवारी रहनु भएको थियो भने कार्यक्रम व्यवस्थापन संयोजकमा खड्क बहादुर केसीले महत्वपूर्ण भूमिका निभाएको बताइएको छ ।

स्थानीयबासी पनि अस्पतालको नयाँ स्वरुपप्रति खुशी व्यक्त गरेका छन् । स्थानीयबासी चेतप्रसाद श्रेष्ठका अनुसार पहिलेको तुलनामा अहिले अस्पताल परिसर निकै आकर्षित र व्यवस्थित देखिन्छ । अस्पताल परिसरको बाह्य वातावरण सहज मात्र नभई स्वास्थ्य सेवास्तरमा समेत बढोत्तरी भएको छ । अस्पतालका मेसु डाक्टर पौडेलका अनुसार इमर्जेन्सी र ओपिडी गरी दैनिक स्वास्थ्यसेवा लिने सेवाग्राहीको संख्या सरदर ३ सय जना रहेको छ ।