आगलागीबाट आफ्नो डेरी उद्योग ध्वस्त भई गहिरो पिडामा परेका पर्वतको कटुवाचौपारी गाउँका युवा उद्यमीलाई परदेशमा रहेका साथाीभाइको आर्थिक सहयोग मिलेको छ । गाउँमा रसल डेरी उद्योग संचालन गर्ने ३९ वर्षे युवा रामसागर लामिछानेलाई अमेरिका बस्ने युवाहरु मिलेर ५ लाख रकम सहयोग गरेका हुन् ।
जिल्लाको कुश्मा नगरपालिका वडा ९ कटुवाचौपारी घर भएका युवा लामिछानेको जीवनमा यही चैतको ३ गते दिउँसो कहिल्यै नसोचेको दुर्घटना आइलाग्यो । आफ्नै आँखा अगाडि वर्र्षाैको आफ्नो लगानीमा स्थापना गरेको रसल डेरी उद्योगमा अचानक आगलागी हुँदा केही क्षणमा खरानी हुन पुग्यो । घरकी श्रीमतीले ग्याँसमा दुध तताउदै गर्दा ग्याँस लिक भई आगलागी हुन पुगेको थियो ।
युवा उद्यमी लामिछानेले गाउँकै भाई अनुज लामिछाने हाल अमेरिका बस्नेको पहलमा भएको आर्थिक सहयोगले आफूलाई हिम्मत र हौसला मिलेको बताउनुहुन्छ । आगलागीमा परी डेरी उद्योगमा प्रयोगमा आएका दुध तताउने मेशीन, चिस्याउने मेशीनसँगै दुग्धजन्य उत्पादित सवै खाद्यान्न सामाग्रीहरु गरी लाखौ मूल्य बराबरका भौतिक सम्पत्ति स्वाहा भए ।
युवा उद्यमी लामिछाने भन्नुहुन्छ–आफ्नो माटोमै केही गर्नुपर्छ भनी विदेशमा राम्रो कमाइ हुँदाहुँदै फर्किएको हो । फेरि धूँवा र खरानी टक्कटकाएर पहिलेभन्दा अरु बढी संघर्ष गरी आफ्नै गाउँमा उद्यम गर्छु भनी लागेको व्यक्तिलाई मेरा गाउँले साथीभाईहरुले आर्थिक सहयोग गर्नु भएको छ । साथीभाईको साथ र सहयोगले मलाई थप खुसी र उर्जा मिलेको छ ।
पीडित युवा लामिछाने श्रम, पसीना रोजगारीका लागि पाँच वर्ष दक्षिण कोरिया बसेर फर्र्किएका हुन् । कोरियामा लिएको कामको अनुभव र डेरी उद्योगमा गरेको कडा मिहिनेतले गाउँमै बसेर मासिक एक लाख कमाइ गरेको अनुभवका कारण पनि युवा लामिछानेलाई केही गर्न सक्छु भन्ने आत्मविश्वास छ ।
कोरियाबाट कमाइ ल्याएको करीव ४५ लाख रुपैया साथै उद्योगबाट कमाइ गरेको रकम समेत डेरी उद्योग संचालनमा लगानी गरेका लामिछानेले आगलागि पछि पुनः स्थानीय किसानबाट दुध संकलनको काम सुरु गरिसकेका छन् । उद्योगका लागि लामिछानेलाई आमा र श्रीमतीको साथसहयोग रहेको छ भने आवश्यक पर्दा कामदारहरु समेत लगाइन्छ ।
युवा लामिछानेका अनुसार डेरी उद्योगमा उत्पादन हुने कुराउनी, पनीर, दुध, दही, छुर्पी, खुवा लगायतका खाद्यसामाग्रीहरु स्थानीय किसानहरुबाट खरीद गरिएको दुधबाट नै तयार पारिन्छ । उत्पादित दुग्धजन्य सामाग्रीहरु अधिकांश स्थानीय बजारमा नै खपत हुने हुँदा बजार खोज्नको कुनै समस्या छैन । डेरी उद्योगका लागि चाहिने करीव २ सय ७० लिटर दुध गाउँ वरपरकै फलेवास, रुग्दी, नुहार, भेडाबारे लगायत स्थानहरुबाट स्थानीय किसानहरुसँग खरीद हुने गर्दछ । युवा उद्यमी लामिछानेका अनुसार उद्योग वाणिज्य संघ पर्वतले एक डिफ्रिज सहयोग गरेको छ ।