पर्वतको कुश्मामा पत्रकारिता क्षेत्रको सवलिकरणबारे वृहत्तर चर्चा गरिएको छ । गण्डकी प्रदेश सरकार अन्तर्गत प्रेस रजिष्ट्रार कार्यालयको आयोजनामा मिडियाकर्मीहरु बिच एकदिने छलफल कार्यक्रमको आयोजना भएको हो ।
कार्यक्रममा मिडियामकर्मीहरुले मिडिया संचालनमा आइलागेको समस्या, चुनौती र देखेका संम्भावनाबारे खुलस्त आफ्नो कुरा राखेका थिए । पछिल्लो समयमा जिल्लामा संचालनमा रहेका विभिन्न पत्रपत्रिका, रेडियो, अनलाइन समाचार पोर्टलहरु साँगुरो हुँदै गएको विज्ञापन बजारका कारण अस्तित्व जोगाउन नै हम्मेहम्मे परेको अवस्था छ । पत्रकारहरु पेशागत आर्थिक असुरक्षाका कारण अन्यत्र पलायन हुने क्रम तिव्र छ ।
राज्यको चौथो अंग भनिने पत्रकारिता क्षेत्रलाई राज्यले लोककल्याणकारी विज्ञापनको समानुपातिक वितरण गर्न सकेको छैन । स्थानीय सरकारले समेत मिडियामैत्री वातावरणलाई ख्याल गर्न नसक्दा नागरिकले सहि सूचना प्राप्त गर्न नसक्ने आशंका छ । अनेकौ समस्या र चुनौतीहरुका विच पनि पत्रकारहरुले आफ्नो पत्रकारिता पेशामा संम्भावनाको खोजी गर्न सकिने विश्वास व्यक्त गरेका छन् । सूचना र सञ्चार क्षेत्रमा विकास भएको आधुनिक डिजिटल प्रविधिको भरपूर प्रयोग गरी पत्रकारितालाई अगाडि बढाउनु पर्ने आवश्यकता औल्याइएकोे छ ।
खोजमूलक पत्रकारिता, मिडिया अनुसन्धान, नविन संचार प्रविधिको प्रयोग लगायतबाट अहिलेको कठिन अवस्थाको पत्रकारिता क्षेत्रले आफूलाई अगाडि बढाउन सक्छ भन्ने मिडियाकर्मीहरुको निचोड थियो । पाठक र दर्शकहरुको रोजाई र आवश्यकताको विषयवस्तु उत्पादनमा मिडियाकर्मी गहनढंगले लाग्नुपर्ने सुझाइएको थियो ।
कार्यक्रममा प्रेस रजिस्ट्रार विमला भण्डारीले पत्रकारिताको हकहितको पक्षमा प्रदेश सरकारको पक्षबाट आफूले पहल गर्दै आएका बताउनुभयो । पत्रकारिता क्षेत्रमा समस्या र चुनौतीसँगै सम्भावना पनि रहेको उल्लेख गर्दै मिडियाकर्मीहरुले आपूmलाई अध्ययन, सीप र दक्षतामा अव्वल बनाउनुपर्नेमा सहकर्ता तथा मिडिया अनुसन्धानकर्मीहरु डा. भूमिराज चापागाई र मधु आचार्यले जोड दिनुभयो ।