पर्वत दक्षिणी भेगको बिहादी गाउँपालिकाका सबै वडामा यतिखेर पशु खोप कार्यक्रम संचालन भइरहेको छ । खोप कार्यक्रममा पशु प्राविधिक कर्मचारीहरु सक्रिय भई लागेका छन् । खोप कार्यक्रममा सक्रिय भई लाग्नेमा एक जना महिला कर्मचारी विन्दु रावत पनि छिन् । पशु प्राविधिक विन्दु रावत कर्मचारी मात्रै नभई चौध महिने दुधे शिशुकी आमा पनि हुन् ।
दुधे बालिकालाई काखमा च्यापेर आफ्नो जिम्मेवारी पुरा गर्न पक्कै सजिलो छैन । आमाको दायित्वसँगै राष्ट्रसेवाको कर्तव्य निर्वाह गर्न कर्मचारी रावत पछि हटेकी छैनन् । दैनिक रुपमा पशु चौपायामा देखिने विभिन्न रोगको उपचार, कृत्रिम गर्भाधान, खोप अभियान तथा पशुपालक किसानलाई आवश्यक परामर्श दिनुपर्ने भएकाले कर्मचारी रावत नियमित रुपमा फिल्डमा पुग्ने गर्छिन् । शिशुको हेरचाह गर्ने वैकल्पिक व्यवस्था सहज नहुँदा काखमै बोकेर सेवामा खटिनुपर्ने अवस्था रहेको उनको भनाई छ ।
रावत भन्नुहुन्छर्–नानी सानी छिन् । घरमा छाड्ने अवस्था छैन । जिम्मेवारी पनि पुरा गर्नुपर्छ । त्यसैले शिशुलाई साथमै लिएर काम गरिहेकी छु ।Ú गाउँका स्थानीय किसानहरुले पनि रावतको समर्पणको प्रशंसा गरेका छन् । स्थानीय युवा कृषक शिव कुमार क्षेत्रीले शिशुलाई बोकेरै दुर्गम बस्तीमा पुगेर सेवा दिदा आफूहरु प्रभावित भएको बताउनुभयो । महिलाहरुले मातृत्वसँगै व्यावसायिक जिम्मेवारी पनि सफलतापूर्वक निर्वाह गर्न सक्ने उदाहरण रावत बन्नुभएको छ ।
प्राविधिक कर्मचारी रावत कार्यरत गाउँमा यतिखेर पशुहरुलाई खोरेत र लम्की स्कीनको खोप लगाइदै छ । पशु प्राविधिक रावतको माइती घर सल्यान जिल्ला दार्मा गाउँपालिका ३ हो भने घर रुकुम जिल्ला चौरजहारी नगरपालिका वडा १३ मा पर्छ ।
प्राविधिक रावतले बिहादी गाउँपालिकामा रही सेवा गर्न थालेको ४ वर्ष पुग्न लागेको छ । अहिले पालिकाको वडा १ रही पशु प्राविधिकको रुपमा कार्यरत रावतले गाउँगाउँ पुगेर पशु उपचार, खोप सेवा तथा किसानलाई प्राविधिक परामर्श प्रदान गरिहेकी छन् । कार्यालय तथा फिल्डमा खटिदा शिशुलाई साथमै लिएर जाने रावतको कार्यशैलीले सेवा प्रतिको समर्पण झल्काएको छ ।
बच्चासँगै खोप लगाउदै हिड्न केही कठिन भएपनि आफूलाई कर्मचारी साथीहरुको सहयोगी भावनाले हौसला दिने गरेको रावतको भनाई छ । कर्मचारी रावत भन्नुहुन्छर्–बिहादी गाउँपालिका मेरो जागिरे जीवनमा सेवा गर्ने मौका मिलेको पहिलो स्थान हो । यहाँ धेरै कुरा सिक्ने र बुझ्ने अवसर पाएको । यही गाउँ मेरा लागि प्रगतीको पाइला टेक्ने स्थल भएको हुँदा मलाई पियारो लाग्छ ।Ú
रावतको सक्रियताले सरकारी सेवामा कार्यरत महिलाले भोग्ने चुनौती र उनीहरुको योगदानलाई समेत उजागर गरेको छ । भौगोलिक हिसावले विकट र दुर्गम गाउँमा रहेका वडाहरुमा पुगेर प्राविधिक सेवा पुराउदै आएकी रावतको जागिरको पहिलो नियुक्ति नै विहादी गाउँपालिमा भएको हो । शहिद नेत्रलाल बहुप्राविधिक शिक्षालय सल्यान र राप्ती स्वर्गद्धारी प्राविधिक शिक्षालय तुलसीपुर दाङबाट प्राविधिक शिक्षा हासिल गरेकी उनले २०७९ सालमा सरकारी सेवामा नियुक्ति लिएकी हुन् ।