पछिल्लो समयमा समाजमा विभिन्न प्रकारका अपराधिक घटनामा वृद्धि हुन थालेपछि नागरिकस्तरमा चिन्ता बढेको छ । हत्या, आत्महत्या दुरुत्साहन, चोरी, ठगी, लागूऔषध कारोबार, घरेलु हिंसा, साइवर अपराध तथा महिला र बालबालिका माथि हुने हिंसाजन्य घटनाले समाजमा असुरक्षाको भावना बढाएको छ ।
सुरक्षा निकायका अनुसार पछिल्ला वर्षहरुमा परम्परागत अपराधसँगै प्रविधिको दुरुपयोगबाट हुने साइवर अपराधका घटना समेत बढिरहेका छन् । सामाजिक सञ्जालमार्फत् ठगी, चरित्र हत्या तथा आर्थिक अपराधका घटनाले नयाँ चुनौती थपेको प्रहरीको भनाइ छ । पर्वतको फलेबास गाउँपालिका खानीगाउँमा गत जेष्ठ ७ गते राती विभत्स हत्या भएको अवस्थामा फेला परेकी ५२ वर्षे सन्तु नेपालीलाई डेढ तोला सुनका लागि मारिएको भन्ने प्रहरी अनुसन्धानबाट खुलेको छ । मृतक नेपालीको हत्या अभियोगमा सोही स्थान बस्ने २८ वर्षे कुशल पुरी करीव तीन सातापछि पक्राउ परे ।
गरी खान सक्ने उमेरको एक युवाले आमा उमेरकी महिलालाई डेढ तोला सुनकै लागि हत्या गर्नु डरलाग्दो अराधिक प्रवृत्ति हो । समाजशास्त्रीहरुका अनुसार बेरोजगारी, कुलत, पारिवारिक विखण्डन, सामाजिक मूल्य–मान्यतामा आएको ह्रास तथा प्रविधिको दुरुपयोग अपराध बढ्नुका प्रमुख कारण हुन् । विशेषगरी युवापुस्तामा बढ्दो लागूऔषधको प्रयोग र दुव्र्यसनले अपराधजन्य गतिविधिलाई प्रोत्साहन गरिरहेको बताइन्छ । अपराधका घटनाले व्यक्ति मात्र नभई परिवार र समग्र समाजलाई असर पार्ने भएकाले समयमै नियन्त्रण आवश्यक रहेको सरोकारवालाहरुको तर्क छ ।
प्रदेश अस्पताल पर्वतका निवर्तमान अध्यक्ष तथा युवा सामाजिक व्यक्तित्व शंकर गिरीका अनुसार परिवारबाटै नैतिक शिक्षा, विद्यालयमा सचेतनामूलक कार्यक्रम र समुदायस्तरमा निगरानी बढाउन सके अपराध न्यूनीकरणमा सहयोग पुग्न सक्छ । उद्योग वाणिज्य संघ पर्वतका पूर्व अध्यक्ष तथा अग्रज व्यवसायी व्यक्तित्व होमनारायण श्रेष्ठले बढ्दो अपराधिक घटनाले समाजमा शान्ति, सुरक्षा र सामाजिक सद्भावमाथि चुनौती थपिरहेको अवस्थामा सम्वन्धित सवै पक्षले अपराध नियन्त्रण र सुरक्षित समाज निर्माणका लागि संयुक्त पहल गर्नुपर्ने आवश्यता औल्याउनु हुन्छ ।