पर्वत जिल्लामा चालु आर्थिक वर्ष २०८३/८४ का लागि निर्धारण गरिएको धान खेती क्षेत्रफलमध्ये असारको अन्त्यसम्म करिब ६० प्रतिशत क्षेत्रमा धान रोपाइँ सम्पन्न भएको छ । गतवर्ष असारको अन्त्यसम्म अहिलेको भन्दा बढी प्रतिशतमा धान रोपाइँ भएको थियो ।
कृषि विकास कार्यालय पर्वतका अनुसार जिल्लामा यस वर्ष ७ हजार १६० हेक्टर क्षेत्रमा धान खेती गर्ने लक्ष्य राखिएको छ । हालसम्म ३ हजार ५ सय बढी हेक्टर क्षेत्रमा धान रोपाइँ सम्पन्न भएको छ । अघिल्लो वर्षभन्दा यस वर्ष पर्याप्त वर्षा नभएको र केही क्षेत्रमा विउको व्याडमा रोग देखिएको कारण उत्पादन समेत गतवर्ष प्रति हेक्टर २६ हजार ८ सय ३९ मेट्रिक टन भन्दा कम हुने आँकलन गरिएको कृषि प्राविधिक मनिषा कुमालले बताउनुभयो ।
जिल्लामा धान खेतीका प्रमुख क्षेत्रहरुमा कुश्मा नगरपालिकाका वडा नं.११, १२, १३ र १४, फलेबास नगरपालिकाका वडा नं.३, ६, ७, र ८, मोदी गाउँपालिकाका वडा नं.२ र ५, जलजला गाउँपालिकाका वडा नं.४, ६, र ७, महाशिला गाउँपालिकाका वडा नं.२ र ५ र विहादी गाउँपालिकाका वडा नं.१, २, र ३, त्यसैगरी पैयुँ गाउँपालिकाका वडा नं.२, ४, ५ र ७ रहेका छन् ।
कृषि विकास कार्यालय पर्वतका प्रमुख गोपाल लामिछानेका अनुसार जिल्लामा गुडुरा, पोखरेली जेठोबुढो, गोरिया, एक्ले, अनदी, विरफुली, उषा–३१२, च्याम्पियन र ६४४४ लगायतका धानका जातको खेती भइरहेको छ । समयमै पर्याप्त वर्षा भएमा आगामी साताहरुमा रोपाइँले थप गति लिने र लक्ष्यअनुसार धान खेती सम्पन्न हुने कृषि प्राविधिकहरुको अपेक्षा रहेको छ ।