साउन महिनाको पहिलो सोमबारका दिन पर्वत जिल्लाका शिवालयहरुमा बिहानैदेखि दर्शनार्थी भक्तजनको उल्लेख्य भीड लागेको थियो । साउन महिनामा खासगरी शिवजीको पुजाआराधना गरी भक्तजनहरुले आध्यात्मिक आस्था जनाउने गर्दछन् ।
भगवान् शिवको विशेष पूजा–आराधना गर्ने विश्वासका साथ जिल्लाका गुप्तेश्वर गुफामा गुप्तेश्वर महादेव, अल्पेश्वर गुफा, कुश्माको धनेश्वर शिवालय मन्दिर लगायतका शिवालयमा श्रद्धालुहरु बिहानैदेखि जल, दूध, बेलपत्र, धतुरो, फूलप्रसाद चढाई पूजा–आराधनामा सहभागी भए ।
मन्दिर परिसरमा भक्तजनको सहज आवागमन र सुरक्षाका लागि व्यवस्थापन समिति, नेपाल प्रहरी, सशस्त्र प्रहरी तथा स्वयंसेवक परिचालन गरिएको थियो । आध्यात्मिक पर्यटनको गन्तव्य मानिएको ऐतिहासिक गुफा परिसरमा नेपाल प्रहरी, सशस्त्र प्रहरी साथै नेपाली सेनाका जवानहरुले संयुक्त रुपमा सरसफाई तथा आवागमन सहज बनाउनका लागि श्रमदान गरेका थिए ।
दर्शनार्थीको चाप बढेसँगै मन्दिर व्यवस्थापन समिति र नेपाल प्रहरीका जवानहरुले लाइन व्यवस्थापन र खानेपानीका लागि सहजीकरण गरेको जनाइएको छ । साउन महिनाभर विशेष गरी सोमबार शिवजीको पूजा–आराधना गर्दा मनोकामना पूरा हुने धार्मिक विश्वास रहेकाले युवायुवती, महिला, वृद्धवृद्धा सवै उमेर समूहका भक्तजनको साथै पर्वत जेसिज, इनर ह्वील क्लव पर्वत लगायत संस्थाका प्रतिनिधिहरुको समेत उल्लेख्य सहभागीता देखिएको थियो ।
गुप्तेश्वर धार्मिक तथा पर्यटकीय विकास संस्थाका अध्यक्ष सन्तु गिरीका अनुसार साउन महिनाभर विशेष पूजा, रुद्राभिषेक तथा भजनकिर्तन संचालन गरिनेछ । यसवर्ष अघिल्ला वर्षहरुको तुलनामा भक्तजनको सहभागीता अझ बढ्ने अपेक्षा गरिएको अध्यक्ष गिरीको भनाई छ ।
साउन महिनामा देशभरका शिवालयहरुमा भक्तजनको भीड लाग्ने गर्दछ । श्रद्धालुहरुले बिहान व्रत बसेर शिवलिङ्गमा जलाभिषेक गर्नुका साथै परिवारको सुख, शान्ति, समृद्धि र दीर्घायुको कामना गर्दै शिवजीको पूजाअर्चना गर्दछन् ।