पर्वतको जलजला गाउँपालिका फर्सेस्थित मालढुंगा बेनी सडक खण्डमा गुडिरहेको मोटरसाइकल पहिरोले बगाउँदा शुक्रबार दिउँसो बाइक चालक गंम्भीर घाइते भएका छन् । मालढुंगाबाट बेनी जाँदै गरेको लु ४१ प २१५७ नम्वरको मोटरसाइकल हाँकिरहेका लाल बहादुर सुवेदी गंम्भीर घाइते हुनुभएको हो ।
जिल्ला प्रहरी कार्यालयका प्रमुख डिएसपी विजय यादवका अनुसार गुडिरहेको मोटरसाइकल माथि करीव ८० मीटर माथिको खेत भत्किन गई पहिरोले बगाएको हो । बाइकलाई घटनास्थलबाट निकाल्न सकिएको छैन । पहिरोमा परी गंम्भीर शरीरको भित्री भागमा गंम्भीर चोट लागेका ४२ वर्षे घाइते सुवेदीलाई उपचारका लागि प्रदेश अस्पताल बेनी पठाइएको छ । घाइते सुवेदीको जलजला गाउँपालिका ४ लामखेत घर भएको बताइएको छ ।
प्रहरी प्रमुख यादवले पहिरोका कारण अवरुद्ध सडकलाई प्रहरीको उद्धार टोलीको सहयोगमा एकतर्फी खुलाइएको र घटनाको थप विवरण आउन बाँकी रहेको बताउनुभयो ।