पर्वत जिल्लामा चालु आर्थिक वर्ष २०८३/०८४ का लागि अनुमान गरिएकोमध्ये साउनको चौथो हप्तासम्म ९५ प्रतिशत धान रोपाइँ सम्पन्न भएको छ । जिल्लामा अनुमान गरिएको ७ हजार १ सय ६० हेक्टर क्षेत्रफलमध्ये हालसम्म ६ हजार ८ सय २ हेक्टरमा धान रोपाइँ भएको छ । यो कुल लक्ष्यको ९५ प्रतिशत हो ।
कृषि विकास कार्यालय पर्वतका प्रमुख गोपाल लामिछानेका अनुसार जिल्लाको सात वटा पालिकामध्ये मोदि गाउँपालिकामा धान रोपाइँ शतप्रतिशत पुगेको छ । मोदी गाउँपालिकामा ९ सय ४२ हेक्टरमध्ये ९ सय ४२ हेक्टर -१०० प्रतिशत) मा रोपाइँ सम्पन्न भएको कार्यालयले जनाएको छ ।
फलेबासमा १ हजार ३ सय ५१ हेक्टरमध्ये १ हजार २ सय ६५ हेक्टर-९३.६० प्रतिशत) मा रोपाइँ सम्पन्न भएको छ । जिल्लाको सवैभन्दा बढी धान खेती हुने कुश्मा नगरपालिकामा २ हजार ५ सय २५ हेक्टरमध्ये २ हजार ३ सय ४८ हेक्टरमा रोपाइँ सम्पन्न भएको कार्यालयले जनाएको छ । जलजला गाउँपालिकामा ८ सय १८ हेक्टरमध्ये ७ सय ७७ हेक्टर, महाशिला गाउँपालिकामा ३ सय ९९ हेक्टरमध्ये ३ सय ७९ हेक्टर, बिहादी गाउँपालिकामा ३ सय ८५ हेक्टरमध्ये ३ सय ६६, पैयुँ गाउँपालिकामा ७ सय ४० हेक्टरमध्ये ७ सय २५ हेक्टर-९७.९६ प्रतिशत) क्षेत्रमा रोपाइँ सम्पन्न भएको छ ।
कार्यालयका कृषि प्राविधिक मनिषा कुमालका अनुसार कुश्मा नगरपालिका १ र २ का केही क्षेत्र बाहेक अधिकांश स्थानमा रोपाइँ सकिएको छ । फलेवास नगरपालिका ३, ६, ७ र ८ तथा मोदी गाउँपालिकाका सबै क्षेत्रमा रोपाइँ सम्पन्न भइसकेको छ भने जलजला, महाशिला, बिहादी र पैयुँका केही उच्च तथा ढिलो रोपाइँ हुने क्षेत्रमा मात्र काम बाँकी रहेको बताइएको छ ।
जिल्लामा सिनुवा, पोखरेली जेठो बुढो, एक्ले, गुडुरा, चम्पेन र यूएस–३१२ लगायतका धानका जात किसानले मुख्य रुपमा लगाउँदै आएका छन् । केही ढिलाइ गरी पर्याप्त वर्षा भएकाले यस वर्ष रोपाइँ सन्तोषजनक रुपमा अघि बढेको कृषि विकास कार्यालय पर्वतले जनाएको छ ।