पर्वत जेसीजको आयोजनामा हुने पर्वत जेसीज कप–२०८३ सेभेन ए साइड खुला फुटबल प्रतियोगिताको तयारी तीव्र पारिएको छ । पर्वत जेसीजले युवालाई खेलकुदमा आकर्षित गर्दै स्थानीय खेलाडीको प्रतिभा पहिचान तथा प्रवद्र्धन गर्ने उद्देश्यले रु.१ लाख ११ हजार राशिको ७ ए साइड खुला फुटबल प्रतियोगिता आयोजना गर्न लागिएको हो ।
प्रतियोगिता यही साउन २८ गतेदेखि ३१ गतेसम्म पर्वत जिल्लाको कुश्मा नगरपालिकाको बडागाउँ खेल मैदानमा संचालन हुनेछ । चार दिनसम्म संचालन हुने प्रतियोगितामा राष्ट्रियस्तरका उत्कृष्ट टोली तथा स्थानीय खेलाडीको सहभागिता रहने जेसीज पर्वतका महासचिव रामचन्द्र सुवदीले बताउनुभयो ।
फुटबल प्रतियोगिता तयारी अन्तर्गत खेलमैदान व्यवस्थापन, टिम सहभागिता, प्रचारप्रसार तथा अन्य आवश्यक व्यवस्थापनका कामलाई तीव्रता दिइएको आयोजकले जनाएको छ ।
पर्वत जेसीजका अध्यक्ष–२०२६ जेसी शर्मिला शर्माका अनुसार प्रतियोगितामार्फत् जिल्लामा फुटबल खेलको विकास गर्नुका साथै युवामा अनुशासन, नेतृत्व क्षमता र आपसी भाइचाराको भावना विकास गर्ने, खेलकुदसँगै वातावरण संरक्षणको सन्देश प्रवाह गर्ने माध्यमका रुपमा समेत अघि बढाइएको छ । खेलकुदले समाजलाई एकतावद्ध बनाउन महत्वपूर्ण भूमिका खेल्ने भन्दै अध्यक्ष शर्माले प्रतियोगितामा खेलाडी, क्लब, खेलप्रेमी, संचारकर्मी तथा सरोकारवालाई सहयोग र सहभागिताका लागि आग्रह गर्नुभयो ।
प्रतियोगिताको विजेता टोलीले रु.१ लाख ११ हजार १११ नगद सहित ट्रफी, मेडल र प्रमाणपत्र प्राप्त गर्नेछ । उपविजेतालाई रु.५५ हजार ५ सय ५५ नगदसहित ट्रफी, मेडल र प्रमाणपत्र दिइनेछ । उत्कृष्ट खेलाडी, उत्कृष्ट गोलरक्षक, सर्वाधिक गोलकर्ता, उदयीमान खेलाडी, फेयर प्ले टिमका लागि समेत विशेष पुरस्कारको व्यवस्था गरिएको आयोजकले जनाएको छ । प्रतियोगिताका संयोजक जेसी एन्जोल कर्माचार्यका अनुसार अहिलेसम्म केही टिमले प्रतियोगिताका लागि दर्ता गरिसकेको र १६ वटा टिम सम्पर्कमा आएका छन् ।
पर्वत जेसीज नेपाल जेसीजअन्तर्गतको गैरराजीतिक तथा गैरनाफामूलक युवा संस्था हो । सन् १९९६ मा स्थापना भएको पर्वत जेसीजले व्यक्तित्व तथा नेतृत्व विकाससँगै सामाजिक पर्वतलाई खेलकुद गतिविधिको केन्द्रका रुपमा प्रवद्र्धन गर्न सहयोग पुग्ने साथै स्थानीय पर्यटन तथा आर्थिक, शैक्षिक, स्वास्थ्य, वातावरण र खेलकुदका क्षेत्रमा विभिन्न गतिविधि संचालन गर्दै आएको छ ।