पर्वत र बाग्लुङ जोड्ने कालीगण्डकी माथिको मालढुंगा मोटरेबल पुल बाढीजन्य कटानका कारण जोखिममा परेको छ । पुलको पर्वततर्फको एप्रोच र पिल्लर नजिककोजमिन बगाएपछि तत्कालीन जोखिम कम गर्न त्रिपाल टाँगेर अस्थायी संरक्षण गरिएको छ ।
गतहप्ता लगातार वर्षापछि कालीगण्डकी नदको बहाव बढ्दा पुलको आधार क्षेत्र कटान भएको हो । कटान बढ्दै गएपछि थप पहिरो र माटो बग्न नदिन ढल्किएको भागमा निलो त्रिपालले छोपिएको दृश्य अहिले मालढुंगामा देखिन्छ ।
सडक डिभिजन कार्यालयका प्राविधिकहरुले प्रारम्भिक निरीक्षण गरिसकेको बताएका छन् । नदीको बहाव उच्च रहेकाले तत्काल स्थायी मर्मत सम्भव नभएको र पानीको सतह घटेपछि विस्तृत प्राविधिक मूल्यांकन गरी संरक्षण तथा मर्मतको कार्य सुरु गरिने जनाइएको छ । पर्वततर्फको कालीगण्डकी किनार माथि पोखरा–बाग्लुङ राजमार्ग छेउ बसोबास गर्दै आएका स्थानीयबासीले समेत आफ्नो बाढीका कारण आफूहरु जोखिममा परेको गुनासो गरेका छन् ।
स्थानीयबासी तथा कुश्मा नगरपालिका वडा १ का अध्यक्ष खगराज पौडेलले त्रिपाल टाँग्नु तत्कालीन उपाय भए पनि कटान नियन्त्रणका लागि ग्याविन, तटबन्ध र पिल्लर संरक्षणको स्थायी योजना तत्काल कार्यान्वयन गर्न सरकारसँग माग गर्नुभएको छ । अध्यक्ष पौडेलले पुलमा थप क्षति पुगे पर्वत–बागलुङ बीचको आवागमन र कालीगण्डकी करिडोरको यातायात समेत प्रभावित हुन सक्ने चिन्ता व्यक्त गर्नुभयो ।