पर्वतको फलेवास नगरपालिका १० कुर्घामा आइतवार दिउँसो अटो दुर्घटना हुँदा सवारमध्ये एकको मृत्यु भएको छ । अटोमा सवार ४ जना घाइते भएका छन् । पर्वत विहादी गाउँपालिका वडा १ वस्ने वर्ष ४९ का प्रेम बहादुर विकको दुर्घटनामा परी मृत्यु भएको छ ।
प्रहरी चौकी फलेवासबाट प्रहरी सहायक निरीक्षक उत्तम अर्मजाको नेतृत्वमा खटिएको प्रहरी टोलीले घाइतेहरुको उद्धार गरी उपचारका लागि प्रदेश अस्पताल कुश्मा पठाएको थियो । अस्पताल पुराइएका घाइते विकलाई डाक्टरहरुले मृत घोषणा गरेका थिए । दुर्घटनामा घाइतेमध्ये अटो चालक फलेवास ११ पाङराङ बस्ने वर्ष ३६ का मन बहादुर परियारको बायाँ ढाड र कुममा चोट लागेको अस्पतालले जनाएको छ । चालक परियारको अवस्था सामान्य रहेको छ ।
अटो दुर्घटनामा परेका वर्ष २४ की कविता विक र वर्ष १५ की अन्जुली विक दुवै जनाको दाहिने खुट्टामा चोट लागेको छ भने उहाँहरुको अवस्था मध्यम रहेको जनाइएको छ । त्यसैगरी अटोमा सवार वर्ष १३ की दुर्गा विकको टाउकोमा भित्री चोट छ । अस्पतालका अनुसार विक पनि अवस्था मध्यम छ । घाइतेहरु तीन जना नै विहादी गाउँपालिका १ बाच्छा देउरालीका स्थानीय वासिन्दा हुनुहुन्छ ।
प्रहरीका अनुसार लुंखुबाट बाच्छातर्फ आउँदै गरेको ध.१ ह ६१ नं.को अटो ओरालोमा ब्रेक फेल भई नियन्त्रण गुमाइ सडकदेखि करीव १० मिटर तल खस्न पुगेको थियो ।