वैदिक सनातन परम्पराको संरक्षण र प्रचार गर्न भनी संचालनमा रहेको गण्डकी कोटिहोम महायज्ञमा दर्शनार्थी र भक्तजनको उत्साहप्रद सहभागिता रहदै आएको छ ।
गण्डकी कोटिहोम महायज्ञ पोखरा महानगरपालिका–१७, विरौटामा भव्य र सभ्य रुपमा संचालन भइरहेको छ । यो ऐतिहासिक शत कुण्डीय गायत्री कोटिहोम विराट ज्ञान महायज्ञ २०८२ वैशाख १७ देखि जेठ २६ गतेसम्म संचालन हुनेछ । धार्मिक जनचेतना अभिवृद्धि गर्नुका साथै सामाजिक सद्भाव र आध्यात्मिक ज्ञान फैलाउनु हो । महायज्ञमा बढी भन्दा बढी विद्यालयका विद्यार्थीहरुलाई समेत सहभागी गराई युवा पुस्तामा धार्मिक र नैतिक शिक्षा प्रवाह गर्ने सोच रहेको आयोजक पक्षको तर्क छ ।
महायज्ञमा दर्शनका लागि आउने भक्तजन र दर्शनार्थीहरुको संख्या दिनदिनै बढ्दो छ । महायज्ञ स्थलमा साधुसन्त, स्थानीय जनप्रतिनिधि र विभिन्न क्षेत्रका प्रतिष्ठित व्यक्तित्वहरुको आगमन समेत व्यापक छ । कोटिहोमको दर्शन गरी आत्मिक सुख र शान्ति प्राप्तिका लागि देशका विभिन्न स्थानहरुबाट भक्तजनहरु आउदै गरेका छन् ।
महायज्ञमा भारतबाट बेद अध्ययन गरेर आएका साधुसन्त र विदुषीहरुले प्रवचन दिएका छन् । निरंजनी पीठाधीश्वर १००८ आचार्य महामण्डलेश्वर स्वामी कैलाशनन्द गिरिजी महाराजले हवनादी कार्यको सुरुआत गरी महायज्ञको उद्घाटन गर्नुभएको थियो । महायज्ञमा १०० वटा हवन कुण्डहरु निर्माण गरिएको छ ।
यज्ञमा प्रयोग हुने वस्तुहरु–घृत, चन्दन, कपूर, तुलसी, गुग्गुलु ल्वांङ, एलैची, काठ औषधीय वनस्पति आदिका धूप र धूँवाले बायुमण्डलमा फैलिन्छ । वैज्ञानिक परीक्षणहरुले देखाएका छन् कि यी पदार्थहरु जलेर एयर प्यूरिफायर जस्तै काम गर्छन् । व्याक्टरिया, भाइरस, फंगसको संख्यामा कमी ल्याउँछन् ।
गण्डकी कोटीहोम यज्ञ एक धार्मिक उत्सव मात्र नभई वैदिक ज्ञान, सांस्कृतिक पहिचान, पर्यावरणीय सन्तुलन र गहिरो आध्यात्मिक साधना हो । यसले गण्डकी क्षेत्र मात्र नभई सम्पूर्ण नेपालका लागि धार्मिक र सांस्कृतिक उर्जा ल्याउने विश्वास गरिएको छ ।