पर्वत जिल्लामा माध्यमिक शिक्षा परीक्षा-एसईई) नतिजा हेर्दा सात वटा विद्यालयको सतप्रतिशत उत्तिर्ण देखिएको छ । जिल्लाभरबाट सतप्रतिशत विद्यार्थी उत्तिर्ण गराउने सामुदायिक विद्यालयको संख्या ४ वटा छ भने संस्थागत तर्फ ३ वटा रहेका छन् ।
सामुदायिक तर्फ सतप्रतिशत उत्तिर्ण नतिजा दिने विद्यालयहरुमा सुवेदी न्वारथर मावि पाङ कुश्मा नगरपालिका, ग्रामोदय मावि भँगरा महाशीला गाउँपालिका, फलेवास नगरपालिकाका अन्नपूर्ण मावि र त्रिभुवन मावि रहेका छन् । त्यसैगरी संस्थागततर्फ सतप्रतिशत विद्यार्थी उत्तिर्ण गराउने विद्यालयहरुमा कुश्मा नगरपालिकास्थित राष्ट्रिय बालशिक्षा सदन, आइबल एकेडेमी र शहिद स्मारक छन् ।
आइबल एकेडेमीकी विद्यार्थी कृष्मा पराजुली जिल्लाभरबाट ४ जिपिए हासिल गर्ने पाँच जना विद्यार्थीहरुमध्ये एक जना हुन् । जिल्लाभरबाट एसईईमा ४ जिपिए हासिल गर्ने विद्यार्थीहरुमध्ये सामुदायिक विद्यालय नारायण माविका अनुपम सुवेदी र अनुप पोख्रेल गरी दुई जना छन् भने बाँकी संस्थागत विद्यालयहरु आदर्श अंगे्रजी बोर्डिङ स्कुलका विनायक भुषाल, नमूना आवासीय माविका सक्षम केसी छन् ।
सतप्रतिशत विद्यार्थी उत्तिर्ण गराउने विद्यालयको संख्या केही कम जस्तो देखिए पनि समग्र नतिजा भने गतवर्ष भन्दा सुधार देखिएको छ । गतवर्ष भन्दा यसपाली एसईई २०८२ मा उत्तिर्ण हुने विद्यार्थीको प्रतिशत वृद्धि भएको छ । जिल्लामा गतवर्ष एसईईमा शुन्य नतिजा आउने विद्यालयको संख्या ३ वटा थियो ।
गतवर्ष जिल्लाबाट एसईई दिनेमध्ये ६० प्रतिशत उत्तिर्ण रहेकोमा यसपाली ७ प्रतिशत वृद्धि भई उत्तिर्ण विधार्थीको प्रतिशत ६७.२६ प्रतिशत रहेको शिक्षा समन्वय इकाइ कार्यालय पर्वतले जनाएको छ । जिल्लाको उत्तिर्ण नतिजा प्रतिशत राष्ट्रिय औसत अर्थात् ६६ प्रतिशत भन्दा बढी हो ।
जिल्ला शिक्षा विकास तथा समन्वय इकाइ कार्यालय पर्वतका अनुसार पछिल्ला केही वर्षयता जिल्लामा एसर्ईई परीक्षार्थी संख्या निरन्तर घट्दो छ । यस वर्ष जिल्लाबाट १ हजार ६८३ जनाले परीक्षा दिएका थिए । जुन अघिल्लो वर्षको तुलनामा कम हो । गत वर्ष जिल्लाबाट १ हजार ८१३ जना विद्यार्थी परीक्षामा सहभागी थिए भने अघिल्लो वर्ष सहभागी हुने विद्यार्थीको संख्या २ हजार ५० थियो ।