पर्वतको कुश्मा नगरपालिका स्तरीय राष्ट्रपति स्तरीय रनिङ शिल्ड प्रतियोगिताको प्रथम उपाधि नारायण माध्यमिक विद्यालयले हासिल गरेको छ । सदरमुकाम कुश्माको वडागाउँस्थित शसस्त्र प्रहरीको खेल मैदानमा भएको राष्ट्रपति रनिङ शिल्ड प्रतियोगितामा यस वर्ष २३ वटा विद्यालयले भाग लिएका थिए ।
पहिलो हुने नारायण माविले १६ स्वर्ण, ९ रजत र १३ कास्य पदक प्राप्त गर्न सफल भएको थियो भने दोस्रो हुने नमूना आवासीय माविले ९ स्वर्ण, ९ रजत र ९ कास्य पदक साथै गुरुकुल एकेडेमीले ८ स्वर्ण, ८ रजत र ३ कास्य पदक हासिल गरी तृतीय स्थान हासिल गरेको थियो । त्यसैगरी सदरमुकाम भन्दा बाहिर रहेको दुर्लुङको काफलचौर माविले ५ स्वर्ण, ४ रजत र १ कास्य पदक प्राप्त गरी सान्त्वना बन्न सफल भएको छ । यस वर्ष पहिलो हुने नारायण माविले लगातार चौथो पटक सम्म प्रथम भई शिल्ड हात पार्न सफल भएको हो ।
प्रतियोगितामा पहिलो, दोस्रो, तेस्रो र सान्त्वना स्थान हात पार्न सफल विद्यालयहरुले पुरस्कार स्वरुप क्रमशः पहिलोले ५१ हजार एक सय ११, दोस्रोले ३१ हजार एक सय ११, तेस्रोले २१ हजार एक सय ११ र सान्त्वना हुनेले ११ हजार एक सय ११ रुपैयाँ नगद जित्ने जनाइएको छ ।