राष्ट्रियस्तरको माध्यमिक शिक्षा परीक्षा-एसइइ) सुरु भएको आज पहिलो दिन पर्वतमा शान्तिपूर्ण र व्यवस्थित रुपमा सम्पन्न भएको छ । पहिलो दिन अनिवार्य अंग्रजी विषयको परीक्षा संचालन गरिएको हो ।
जिल्ला शिक्षा विकास तथा समन्वय इकाइ कार्यालय पर्वतका अनुसार सबै परीक्षा केन्द्रहरुमा आवश्यक सुरक्षा व्यवस्था मिलाइएको थियो । परीक्षा केन्द्रमा अनुगमनलाई समेत प्रभावकारी बनाइएको थियो । समन्वय इकाइले जनाए अनुसार कुनै पनि परीक्षा केन्द्रमा अप्रिय घटना हुन पाएको छैन । समन्वय इकाइ कार्यालयका प्रमुख मतिलाल चपाईका अनुसार परीक्षा मर्यादित र निष्पक्ष वातावरणमा सम्पन्न भएको छ ।
देशभरबाट यसपालीको एसइइ परीक्षामा ५ लाखभन्दा बढी विद्यार्थीहरु सहभागी छन् । पर्वतमा पछिल्ला केही वर्षयता जिल्लामा एसर्ईई परीक्षार्थी संख्या निरन्तर घट्दो छ । यस वर्ष जिल्लाबाट १ हजार ६८४ जनाले परीक्षा दिने तयारी गरेका छन् । जुन अघिल्लो वर्षको तुलनामा कम हो । गत वर्ष जिल्लाबाट १ हजार ८१३ जना विद्यार्थी परीक्षामा सहभागी थिए भने अघिल्लो वर्ष सहभागी हुने विद्यार्थीको संख्या २ हजार ५० थियो ।
समन्वय इकाई कार्यालय पर्वतका प्रमुख मतिलाल चपाईका अनुसार जिल्लाका विभिन्न स्थानीय तहमा विद्यार्थी संख्या घट्दा विद्यालयमा अध्ययनरत विद्यार्थीको संख्या पनि कम हुँदै गएको हो । ग्रामीण क्षेत्रबाट बसाइँसराई बढ्नु, अभिभावकको रोजगारीका लागि विदेश तथा शहरतर्फ पलायन हुनु तथा निजी विद्यालयतर्फ आकर्षण बढ्नु, घट्दो जन्मदरका कारण विद्यार्थी संख्या घट्दै गएको सरोकारवालाको ठम्याई छ ।
जिल्लाको कुश्मा नगरपालिका, फलेवास नगरपालिका, जलजला गाउँपालिका, महाशिला गाउँपालिका, मोदी गाउँपालिका र पैयुँ गाउँपालिकाका केही सामुदायिक विद्यालयमा विद्यार्थी संख्या न्यून हुँदै गएको छ । जिल्लाका ३२ बढी सामुदायिक विद्यालयमा विद्यार्थी संख्या शून्य रहेका छन् । विद्यालय मर्जको प्रक्रिया अगाडि बढाउन सकेको देखिदैन । ।
जिल्लाभर विद्यार्थीको संख्या घट्दो दरमा रहेको भएपनि सदरमुकाम कुश्मामा रहेको नारायण माध्यामिक विद्यालयले अघिल्लो वर्षभन्दा यसवर्ष बढी विद्यार्थीलाई एसईई परीक्षामा सहभागी गराएको छ । नारायण माविका प्रअ प्रकाश रिजालका अनुसार यसवर्ष एसईईमा सहभागी हुनेको विद्यार्थीको संख्या १ सय २५ रहेको छ ।
एसर्ईई परीक्षाका लागि जिल्लामा ९ वटा परीक्षा केन्द तोकिएको छ । परीक्षालाई मर्यादित बनाउन भनी परीक्षा केन्द्र रहने विद्यालयमा सम्वन्धित विद्यालयको शिक्षकलाई केन्द्राध्यक्षको जिम्मेवारी नदिइएको जनाइएको छ । शिक्षा मन्त्रालयले यसपाली एसइइ परीक्षाको नतिजा एक महिना भित्रै प्रकाशित गर्ने बताइसकेको छ । शिक्षा समन्वय इकाइका सहायक प्राविधिक चिरञ्जिवी न्यौपानेका अनुसार परीक्षा सम्पन्न हुँदा साथै विषयगत शिक्षकले समन्वय इकाइ कार्यालयको परीक्षण केन्द्रमा उत्तरपुस्तिका चेकजाँच गर्ने व्यवस्था मिलाईएको छ । उत्तरपुस्तिका चेकजाँच व्यवस्थित होस् भनी अन्तरपालिकाका शिक्षकहरुलाई जिम्मेवारी दिइनेछ ।