आगामी फागुन २१ गते हुने प्रतिनिधिसभा सदस्य चयनका लागि हुने निर्वाचनमा पर्वतबाट स्वतन्त्र ४ सहित गरी १७ जनाले उम्मेदवारी दिएका छन् । उम्मेदवार दिने १७ जना मध्ये एक जना मनहरि तिमिल्सिनाले मात्रै चुनावी प्रतिवद्धता सार्वजनिक गरेका छन् भने बाँकी कसैले पनि गरेका छैनन् ।
संसद उम्मेदवारको प्रतिवद्धता लोकतन्त्रको मेरुदण्ड जस्तै हो । चुनाव आउन अब मात्र २५ दिन बाँकी रहँदा सम्म चुनावी प्रतिवद्धता अधिकांशको आएको छैन । भाषण र नाराभन्दा पर गएर जिल्लामा के गर्ने, कसरी गर्ने र कति समयभित्र गर्ने भन्ने स्पष्टता नै प्रतिवद्धता अर्थात् वाचापत्रको सार हो । वाचापत्र भनेको मतदातासँगको नैतिक सम्झौता हो ।
भोट माग्ने बेला गरिएका वाचा पूरा गर्ने इच्छाशक्ति र इमानदारिता नहुँदा लोकतन्त्रमा विश्वास खस्किन्छ । स्पष्ट प्रतिवद्धता भएमा निर्वाचित भएपछि जनप्रतिनिधिलाई पर्वतेली जनताले प्रश्न गर्न, मूल्यांकन गर्न र दबाब दिन सजिलो हुन्छ । मैलै त यस्तो भनेकै थिइनँ भन्ने बहानाको ठाउँ हुँदैन ।
जिल्लामा मूख्यगरी चार दल नेपाली कांग्रेस, नेकपा एमाले, नेपाली कम्युनिष्ट पार्टी र रास्वपा विच नै कडा प्रतिस्पर्धा हुने देखिन्छ । यी चार दलका उम्मेदवारहरु क्रमशः अर्जुनप्रसाद जोशी, पदम गिरी, मनहरि तिमिल्सिना र सागर भुषाल रहेका छन् । यीमध्ये नेपाली कम्युनिष्ट पार्टीका उम्मेदवार मनहरि तिमिल्सिनाले मात्रै चुनावी प्रतिवद्धता सार्वजनिक गरी गाउँघरका मतदातासम्म पुराइसकेको बताउनुहुन्छ ।
कांग्रेसका उम्मेदवार जोशीले अपिल तयार भएको तर प्रतिवद्धता अव छिटै आउने बताउनुहुन्छ । उम्मेदवारले दिने प्रतिवद्धताले संसदमा उम्मेदवार कुन मुद्दा उठाउँछ, कुन विद्येयकमा उभिन्छ र कसको पक्ष लिन्छ भन्ने कुरा तय गर्छ । यो व्यक्तिगत मात्र नभई पर्वत जिल्लाको विकास र राष्ट्रिय नीतिसँग जोडिन्छ ।
प्रतिवद्धताले भाषणबाजी, जात, नाता, दलको झण्डा भन्दा माथि उठेर योग्यता र दृष्टिकोणका आधारमा उम्मेदवार छान्न मतदातालाई सहयोग गर्छ । उम्मेदवारहरु आफ्नो प्रतिवद्धतामा गम्भीर हुन्छन् र जनताले पनि उनीहरुको प्रतिवद्धतामा प्रश्न गर्छन् भने मात्रै लोकतान्त्रिक संस्कारको विकास हुन्छ ।
संसद उम्मेदवारको प्रतिवद्धता कागजी घोषणापत्र मात्र होइन, त्यो इमान, दृष्टि र कार्यान्वयन क्षमताको परीक्षा हो । मतदाताले व्यक्तित्व होइन, प्रतिवद्धता र त्यसलाई पूरा गर्ने सामाथ्र्य हेरेर निर्णय गरेमा मात्रै संसद बलियो र विश्वास योग्य हुन्छ । पटक पटक संसद भंग हुने र देश अस्थिरताको दुस्चक्रमा फस्ने खतरा कम हुन्छ । पर्वत जिल्लाको हकमा उमेरले कान्छो उम्मेदवार नेपाली कम्युनिष्ट पार्टीका मनहरि तिमिल्सिनाले सार्वजनिक गरेको विकसित पर्वतका लागि २३ बुँदे प्रतिवद्धता यतिखेर आमसर्वसाधारण, बुद्धिजीवि, विकासप्रेमी नागरिकका लागि चर्चाको विषय भएको छ ।