जेन्जी विद्रोहको बलमा स्थापित बालेन्द्र शाह-बालेन) सरकारले आफ्नो पाँच वर्षे कार्यकालको आज ठीक एक महिनाको अवधि पुरा गरेको छ । गत चैत १३ गते प्रधानमन्त्रीको शपथ ग्रहण गरेका रास्वपा संसदीय दलका नेता बालेन्द्र शाहले एक महिना पुरा गर्दै गर्दा नेपाली जनतामा आशाको दियो बाल्न सफल भएका छन् ।
पिएम बालेन शाहले भ्रष्टचारीलाई सख्त कारवाहीको डण्डा चलाउदै सुशासनको छनक दिएको देखिन्छ । पुराना मानिएका राजनीतिक दलले भ्रष्टचारीलाई कारवाही गर्नुको सट्टा भरथेग गर्दै आएको देखेका नेपाली जनता वाक्क बनेका थिए । मिडियामा भ्रष्टचारको काण्ड नै काण्डको समाचार सुन्दै वाक्क बनेका नेपाली जनता बालेन सरकार आएपछि भने केही आशावादी बनेका छन् । राज्यका विभिन्न तह र तप्कामा रहि सरकारी स्रोत र साधनमा कानून विपरित दोहन गर्ने व्यक्ति तथा आर्थिक भ्रष्टचार गर्ने भ्रष्टचारीलाई कारवाही अगाडि बढाइएको छ ।
प्रधानमन्त्री बालेन शाहले सम्पत्ति शुद्धिकरण महाअभियान थालेका छन् । बालेन सरकारले शक्तिशाली जाँचबुझ स्थापना गरी गणतन्त्र स्थापना यताका राज्यका हरेक अंगका प्रमुख हर्ताकर्ता व्यक्तिहरुको सम्पत्ति शुद्धिकरणको आदेश दिइसकेको छ । सरकारको गृहमन्त्री पदमा रहेका सुधन गुरुङ शेयर लगानीको विषयमा विवादमा तानिएपछि छानविनका लागि भनी राजीनामा दिन बाध्य भएका छन् । यसअघिका सरकारहरुले सुकुम्वासी समस्या समाधान गर्ने नाममा वर्षमै अरबौ रकम सिध्याउदै आए पनि सुकुम्वासी समस्या समाधान हुन सकेको थिएन । बालेन सरकारले सुकुम्वासी समस्या समाधानका लागि कठोर कदम चालिसकेको छ ।
काठमाडौको थापाथली लगायत नदीकिनारमा वर्षौदेखि अव्यवस्थित बसोबास गर्दै आएका सुकुम्वासीलाई सहजै हटाएको छ । हटाइएका वास्तविक सुकुम्वासीलाई व्यवस्थापन गर्ने दायित्व बालेन सरकारले लिएपछि नेपाली जनताले समेत सरकारको व्यापक समर्थन गरेका छन् । बालेन सकारले ईतिहासमै पहिलो पटक एसईई परीक्षाको उत्तरपुस्तिका परीक्षा दिएकै दिन परीक्षण गरी एक महिनाभित्र परीक्षाको नतिजा प्रकाशित गर्दैछ ।
सरकारले लिएका कदमहरु विश्वविद्यालयलाई राजनीतिक हस्तक्षेप मुक्त बनाइने, नीजामति कर्मचारी राजनीतिक संगठनमा जोडिन नपाइने, विद्यार्थी राजनीति बन्द जस्ता कुराहरु समेत नेपाली जनताले सुशासनका लागि आवश्यक भनी स्वागतयोग्य ठानेका छन् ।
नेपाली जनताले ठुलठुला विकासका सपना भन्दा पनि आफ्नो दैनिकी जीवन सहज र सरल होस् भन्ने चाहेका छन् । जनताको चाहना मुलुकमा भ्रष्टचारको रोग निदान भई सुशासन स्थापित होस् भन्ने कामना गरेको अवस्थामा बालेन सरकारले चालेका भ्रष्टचार विरुद्ध र सुशासनको अभियानले देशमा आशा जगाएको छ ।