नेपाल सरकारको प्रधानमन्त्रीमा रास्वपाका वरिष्ठ नेता बालेन्द्र शाह बालेन चयन हुनुभएको छ । राष्ट्रपति रामचन्द्र पौडेलले नेपालको संविधानअनुसार शाहलाई प्रधानमन्त्रीमा नियुक्त गर्नुभएको हो ।
प्रधानमन्त्रीमा नियुक्त हुनुभएका ३६ वर्षे युवा शाहले शुक्रवार पद तथा गोपनियताको शपथ लिनुभएको छ । प्रतिनिधिसभामा रास्वपाले करीव दुईतिहाइ समर्थन पाएको छ । दुई तिहाइको बहुमत समर्थन प्राप्त प्रधानमन्त्रीको नियुक्ति सँगै शुक्रबार नै १५ सदस्ययीय मन्त्री परिषद् गठन गरिएको छ ।
मन्त्रीपरिषदमा स्वर्णिम वाग्ले अर्थमन्त्री, सुधन गुरुङ गृहमन्त्री, सोविता गौतम कानूनमन्त्री, शिशिर खनाल परराष्ट्र मन्त्री, विराजभक्त श्रेष्ठ उर्जामन्त्री, प्रतिभा रावल संघीय मामिला मन्त्री, गीता चौधरी कृषि मन्त्री, सस्मित पोखरेल शिक्षा मन्त्री, विक्रम तिमल्सिना सञ्चारमन्त्री, खडक पौडेल पर्यटन मन्त्री, दिपक शाह श्रम मन्त्री, सुनिल लम्साल भौतिक पूर्वाधार मन्त्री, सीता वादी महिला बालबालिका मन्त्री, निशा मेहता स्वास्थ्य तथा जनसंख्या मन्त्री रहेका छन् ।
बालेन नेतृत्वको सरकारमा सामेल मन्त्रिपरिषद्ले समावेशीतालाई अंगालेको देखिन्छ । सरकारमा विषयगत विज्ञतालाई स्थान दिइएको छ । युवाहरुको बाहुल्य, महिलाको ३३ प्रतिशत प्रतिनिधित्व, पहिलोपटक अति उत्पीडित वादी समुदायको सहभागीता हुनु बालेन सरकारको सुन्दर पक्ष हो ।