पर्वतबाट प्रतिनिधिसभा सदस्यको उम्मेदवारी दिएर चुनावी प्रतिवद्धता सार्वजनिक गर्नेमा उज्यालो नेपाल पार्टीका उम्मेदवार दोस्रोमा परेका छन् । शुक्रवार पत्रकार सम्मेलन मार्फत् उज्यालो नेपाल पार्टीका प्रतिनिधि उम्मेदवार नविन चोचाङगीले चुनावी प्रतिवद्धता सार्वजनिक गरेका हुन् ।
यसअघि नेपाली कम्युनिष्ट पार्टीका उम्मेदवार मनहरि तिमिल्सिनाले आफ्नो राजनीतिक प्रतिवद्धता पर्वतेली जनतामाझ जाहेर गरिसकेका थिए । नेकपाका प्रतिनिधि उम्मेदवार तिमिल्सिनाले २३ बुँदे विकसित पर्वतका लागि मनहरि तिमिल्सनाको रोडम्याप सार्वजनिक गरिसकेपछि जिल्लामा बौद्धिक जमातविच एकखाले बहसको संचार भइरहेको छ ।
उम्मेदवार तिमिल्सिनाका मुख्य प्रतिवद्धताहरुमा आधुनिक कृषि र पर्यटन, पकेट क्षेत्र विकास, गुणस्तरीय शिक्षा व्यवस्था, डिजिटल पर्वत निर्माण, आइसिटी हब, पर्वत विकास सम्मेलन, संसदमा मेरा प्रतिवद्धता, सार्वजनिक प्रतिवद्धता लगायतका महत्वपूर्ण विषयहरु छन् । जसले आममतदाताको मन जितेको छ ।
युवा नेता तिमिल्सिनाको चुनावी प्रतिवद्धता सार्वजनिक भएसँगै जिल्लामा उम्मेदवारले सार्वजनिक गर्ने प्रतिवद्धता कस्को कस्तो हुने भन्नेबारे छलफल भइरहेको छ । यसैबेला उज्यालो पार्टीका प्रतिनिधि उम्मेदवार चोचाङ्गीले सार्वजनिक गरेको ७ बुँदे राजनीतिक प्रतिवद्धताले नागरिक समाजमा थप बहसको बाटो खुलेको छ ।
उम्मेदवार चोचाङ्गीले उठाएका ७ बुँदे मध्ये पहिलो बुँदामा पानी र हावालाई पुनः प्रयोग गरी एकैसाथ विद्युत उत्पादन गर्ने प्रविधिको उल्लेख गरिएको छ । यो प्रविधिबाट उत्पादन गर्दा नेपालमा ८३ हजार मेगावाट मात्र नभई १ करोड मेगावाट भन्दा धेरै उत्पादन हुने दाबी गरिएको छ । महत्वपूर्ण प्रतिवद्धताहरुमा भ्रष्टचार अन्त्यगरी सुशासन स्थापना गर्न नागरिक निगरानी समूह गठन गरिने, कृषि क्षेत्रको अधिकतम विकास गर्नका लागि देशैभर ७ लाख २ हजार कृषि प्रहरी गठन गरिने र बाँझो कृषि जमिनलाई उत्पादनमा जोड्ने, पूर्वाधारको विकासका लागि देशैभर ३ लाख ६० हजार पूर्वाधार प्रहरीको गठन लगायतका बढी महत्वपूर्ण ऐजेण्डाको रुपमा समेटिएको छ ।
प्रतिवद्धतामा आविस्कार वैंक गठन गरी विज्ञान र प्रविधिको विकास गरी देशलाई आर्थिक र प्रविधिमा विश्वकै नमूना देश बनाउने नीति निर्माण गर्ने उल्लेख छ । उम्मेदवार चोचाङगीको प्रतिवद्धतामा उल्लेख गरिएको अर्को महत्वपूर्ण कुरा भनेको गाउँ र शहरमा अहिले भइरहेका मोटरबाटोमा दुर्घटनाको जोखिम भएको हुँदा ईलिेक्ट्रिक रोडले गाउँ र शहर जोडिने बताइएको छ । यसैगरी प्रतिवद्धताहरुमा शिक्षा, स्वास्थ्य, सवै नागरिक उर्जा र प्रविधि मालिक बनाउने लगायतका विषयहरु समेत समेटिएका छन् ।
उज्यालो पार्टी पर्वतका उम्मेदवार चोचाङ्गीले जनताले कुनै व्यक्ति विशेष, पार्टी, पार्टीको चिन्ह भन्दा पनि उम्मेदवारले प्रस्तुत गरेको आर्थिक, सामाजिक, राजनीतिक लगायत भौतिक विकासका ऐजेण्डालाई हेरेर र विचार गरेर आफ्नो अमूल्य मत दिन आग्रह गर्नुभयो । आफ्नो ऐजेण्डा अरुभन्दा फरक र व्यवहारवादी भएको हुँदा सचेत नागरिकले आफूलाई मत दिनेमा विस्वस्त रहेको बताउनुभयो ।
जिल्लामा प्रतिनिधिसभा उम्मेदवारी दर्ता गर्ने ४ स्वतन्त्र सहित पार्टीका प्रतिनिधि १३ गरी १७ जना रहेको भए पनि जनतासँग गरिने नैतिक करार मानिने चुनावी प्रतिवद्धता जारी गर्नेमा अहिलेसम्म दुई जना उम्मेदवार मात्रै रहेका छन् । जिल्लामा सचेत नागरिकले चुनावी प्रतिवद्धताबारे उम्मेदवारहरु विच खुल्ला बहस र छलफल हुनुपर्छ भन्ने धारणा राख्दै आएको भएपछि उम्मेदवारले आँट र हिम्मत गर्न सकेका छैनन् । मतदान आउने दिन छोटिदै र गाउँघरमा मत माग्दै घरदैलो समेत कतिपय उम्मेदवारले गरिरहँदा समेत चुनावी प्रतिवद्धता सार्वजनिक गर्न नसक्नुले आमसर्वसाधारण मतदातामा समेत चासो बढेको छ ।