पर्वत जिल्लाको मतदाता सूचीमा पहिलो पटक तेर्सो लिंगी पहिचान खुलाएका एक जना मतदाता समावेश भएका छन् । निर्वाचन आयोगले अद्यावधिक गरेको प्रारम्भिक मतदाता विवरण अनुसार पर्वतबाट तेर्सो लिंगीको पहिचान सहित नाम दर्ता भएको यो पहिलो उदाहरण हो ।
जिल्ला निर्वाचन कार्यालय पर्वतका सूचना अधिकारी ज्ञानेन्द्र शर्माका अनुसार नागरिकताको लिंग परिचय अनुसार मतदाता सूचीमा नाम समावेश गरिएको हो । यसअघि पुरुष र महिला मात्रै विकल्प रहे पनि पछिल्ला वर्षहरुमा कानुनी तथा नीतिगत व्यवस्था अनुसार तेर्सो लिंगीको पहिचानलाई समेत मान्यता दिइदै आाएको छ ।
निर्वाचन कार्यालयका प्रमुख बुद्धिराम उपाध्यायले संविधानले सुनिश्चित गरेको लैङ्गिक पहिचानका आधारमा सवै नागरिकलाई समान रुपमा मताधिकार प्रयोग गर्ने वातावरण बनाइदै आएको बताउनुभयो । लैगिंक पहिचानका आधारमा कोही पनि मताधिकारबाट वञ्चित हुनु हुँदैन । उहाँले भन्नुभयो,र्–यसले समावेशी लोकतन्त्रलाई थप बलियो बनाउँछ ।’
निर्वाचन कार्यालयका अनुसार पर्वतमा यसपालीको चुनावमा मतदान गर्ने मतदाताको संख्या १ लाख २५ हजार ४ सय ६६ रहेको छ । अघिल्लो २०७९ को निर्वाचनमा मतदाता संख्या १ लाख २२ हजार ६ सय४९ रहेकोमा यो वर्ष थपिनेको संख्या २ हजार ८ सय १७ छ । मतदातामध्ये पुरुषको संख्या ६२ हजार ६ सय छ । महिलाको संख्या ६२ हजार ८ सय ६५ छ भने तेर्सो लिंगीमा मात्र १ जना छ ।
आसन्न निर्वाचन फागुन २१ गतेको प्रतिनिधिसभा सदस्यका लागि पर्वतबाट १७ जना उम्मेदवार चुनावी मैदानमा होमिने भएका छन् । मैदानमा होमिने उम्मेदवार मध्ये विभिन्न राजनीतिक पार्टीसँग आवद्ध रहेका १३ जना छन् भने बाँकी ४ जना स्वतन्त्र हुन् ।