पर्वतको बाच्छामा भक्तपुरे लोकल काँक्राको विउ विक्री गरी महिनामै लाखौ आम्दानी गर्ने कृषक छन् । यो सुन्दा कसैलाई पत्यार नलाग्न सक्छ । अपत्यार गर्नुपर्ने कुनै कारण भने छैन किनभने महिनाको ४ लाख कमाइ गर्ने एक भन्दा धेरै कृषकहरु छन् ।
यतिखेर पर्वतको दक्षिणी भेगमा पर्ने बाच्छा गाउँका कृषकलाई विउ काँक्रा टिप्न कम्मर कसेर लागेका छन् । खेतबारीमा गइ हेर्ने मानिसलाई लाग्छ कि कृषकहरु विउ काँक्रा हैन कि पैसा टिप्दै छन् । कृषकहरु आफ्नो परिश्रमको फल देखेर होला काँक्रा टिप्दै गर्दा अत्यन्तै खुशी र उत्साही देखिन्छन् । जिल्लाको फलेवास नगरपालिकाको वडा १० र ११ साथै विहादी गाउँपालिकाको वडा १ मा पर्ने बाच्छाका कृषकहरुलाई यतिखेर विउ काँक्रा टिप्दा नै भ्याइनभ्याइ भएको छ ।

गत फागुनको पहिलो हप्तामा लगाएको काँक्रा यतिखेर फागुनको दोस्रो हप्तातिर टिप्ने भएको छ । तीन महिनामै विउ काँक्रा तयार हुन्छ । बाच्छाका स्थानीय युवा कृषक शिव कुमार क्षेत्रीले यस वर्ष मात्रै १ सय केजी भन्दा बढी काँक्राको विउ उत्पादन हुने लक्ष्य लिएको बताउनुभयो । कृषक क्षेत्रीले १ सय केजी मात्रै उत्पादन गर्न सके पनि १३ लाख रुपैया बराबर विउ काँक्रा विक्री गरी आम्दानी गर्न सकिने बताउनुहुन्छ । देशमा केही काम छैन र कमाइ गर्न सकिदैन भन्नेहरुका लागि मिहिनेत गरेमा केही हुन्छ भन्ने उदाहरण कृषक क्षेत्रीले देखाउनु भएको छ ।
कृषक क्षेत्रीको भनाई अनुसार कृषक क्षेत्रीको काँक्राको विउ मात्रै विक्री गरी मासिक कमाइ ४ लाख भन्दा बढी हुन जान्छ । कृषक क्षेत्रीले काक्राको विउ मात्रै उत्पादन गर्ने नभई प्याजको खेती साथै पशुपालन समेत गर्दै आउनु भएको छ । उमेरले तीन दशकमै रहेका अगुवा कृषक क्षेत्री यतिवेला अत्यन्तै हर्षित छन् । वैदेशिक रोजगारमा केही वर्ष दक्षिण कोरिया बसेर स्वदेश फर्किएका कृषक क्षेत्रीले कृषि क्षेत्रबाट सोचे भन्दा बढी आम्दानी भएको देख्दा दंग छन् ।
बाच्छा गाउँबाट गत वर्ष काँक्राको विउ विक्री गरी कृषकहरुले १ करोड बढी रकम भित्राएका थिए । विहादी बाच्छाकै ऋषिराम भुषाल पनि काँक्राको विउ उत्पादक कृषक हुन् । कृषक भुषालले १५ रोपनी क्षेत्रफलमा लगाएको विउ काँक्रा खेतीबाट प्रति रोपनी १० केजी विउ उत्पादन हुने दावी गर्नुभयो । उहाँका अनुसार प्रति केजी १३ हजारमा विउ विक्री भएमा तीन महिनामै १९ लाख रुपैया कमाइ हुनेछ ।
कृषक क्षेत्री सृजनशील कृषक समूहको अध्यक्ष हुनुहुन्छ । उहाँको कृषक समूहमा २८ जना कृषकहरु जुटेका छन् । कृषक समूहले १ सय रोपनीमा व्यावसायिक काँक्रा विउ खेती गरेको छ भने बाच्छामा मात्रै २ सय रोपनी क्षेत्रफलमा कृषकहरुले विउ काँक्राको खेती गरिएको छ ।
यस वर्ष पनि मौसमले राम्रो साथ दिएको हुँदा सोही मूल्य बढीको उत्पादन गरिने अड्कल यहाँका स्थानीय कृषकहरुको छ । बाच्छामा मात्रै कृषकहरुले २ सय रोपनी क्षेत्रफलमा विउ काँक्राको खेती गरेका छन् । गत फागुनको पहिलो हप्ता लगाएको काँक्रा जेष्ठको दोस्रो हप्तातिर करीव तीन महिनामा विउ तयार हुन्छ । विउ खरीदका लागि क्रेताहरु कृषकको सम्पर्कमा आइसकेको हुँदा विउ विक्री गर्ने चिन्ता समेत कृषकहरुलाई छैन ।