गण्डकी प्रदेशका उद्योग तथा पर्यटन मन्त्रीले धार्मिक पर्यटन प्रवद्र्धन गरिदा मुलुकको आर्थिक समृद्धिको आधार तयार हुने उल्लेख गर्नुभएको छ । पर्यटन मन्त्री मित्रलाल बस्यालले गण्डकी प्रदेश धार्मिक पर्यटनको संम्भावना रहेकोमा जोड दिदै पर्वत जिल्लाको पवित्र धार्मिस्थल मानिने मोदीवेणी धाममा आयोजित एक कार्यक्रममा उक्त कुरा बताउनु भएको हो ।
समृद्ध नेपाल, सुखी नेपाली भन्ने सपना पुरा गर्न समेत धार्मिक पर्यटन प्रवद्र्धनको आवश्यकता रहेको पर्यटन मन्त्री बस्यालको भनाई थियो । पर्यटन मन्त्री बस्यालले कालीगण्डकी तटीय क्षेत्रमा रहेका विभिन्न धार्मिक स्थलहरुको संरक्षण र प्रवद्र्धन हुन सकेमा वर्षेनी लाखौको संख्यामा धार्मिक पर्यटकहरु भित्राउन सकिने र यसले आर्थिक समृद्धि दिलाउने बताउनु भएको हो ।
कालीगण्डकी नदी तटीय धार्मिक स्थलको प्रवद्र्धन गर्नका लागि आयोजित कार्यक्रममा बोल्दै पर्यटन मन्त्री बस्यालले कालीगण्डकी तटमा अवस्थित पवित्र धार्मिक स्थलहरुको उचित प्रसारप्रसारको आवश्यकता रहेको उल्लेख गर्नु भएको थियो ।
त्रिवेणीधामदेखि मुक्तिनाथसम्म फैलिएको क्षेत्र हिन्दू धर्मावलम्वीहरुका लागि अत्यन्त पवित्र मानिन्छ । यो परिपथमा पर्ने त्रिवेणीधाम, देवघाट, रिडी, उत्तरबाहिनी, सेतीवेणी, मोदिवेणी, गलेश्वरधाम र मुक्तिनाथ जस्ता स्थलहरुले ठुलो धार्मिक महत्व बोकेका छन् । कालीगण्डकी तटीय क्षेत्रमा रहेका धार्मिक स्थलहरुको प्रवद्र्धनका लागि सोही स्थानमा पुगेर पर्वत उद्योगवाणिज्य संघले कार्यक्रमको आयोजना गर्ने भएको हो । धार्मिक पर्यटन प्रवद्र्धनका लागि गण्डकी प्रदेश पर्यटन मन्त्रालयको आर्थिक सहयोग रहेको छ ।
पर्वत उद्योग वाणिज्यसंघका अध्यक्ष ठाकुर वि.पोख्रेलले पर्यटन प्रवद्र्धनको कार्यक्रम मार्फत् त्रिवेणीधामदेखि मुक्तिनाथसम्मको धार्मिक परिपथको महत्व पहिचान गर्नु, धार्मिक पर्यटन प्रवद्र्धन गर्न आवश्यक पूर्वाधारको अध्ययन गर्नु, सम्भाव्य आर्थिक, सांस्कृतिक र सामाजिक प्रभावको विश्लेषण गर्नु साथै एकीकृत तीर्थमार्ग विकासको योजना प्रस्तुत गर्नु रहेको बताउनुभयो ।
पर्यटन प्रवद्र्धन कार्यक्रममा सहआयोजकको रुपमा नेपाल पत्रकार महासंघ पर्वत र फोटोपत्रकार संघ पर्वत समेत रहेका छन् । कालीगण्डकी तटीय महत्वपूर्ण सात धार्मिक स्थलहरुमा हुने धार्मिक पर्यटन प्रवद्र्धन कार्यक्रमको आयोजना शुक्रवार मोदिवेणी धामबाट शुरु गरिएको आयोजकको भनाई छ । कार्यक्रममा स्वामी नारायण आचार्य र वेदवेदांग संस्कृत पाठशाला कुश्माका प्राचार्य रामु पौडेलले कालीगण्डकी नदीको धार्मिक र सांस्कृतिक महत्वबारे प्रवचन दिनुभएको थियो ।