पर्वतका गाउँघरलाई समेत नसर्ने रोगले आफ्नो चपेटामा पार्दै गएको देखिन्छ । जिल्लाको दक्षिणी भेगमा पर्ने महाशीला गाउँपालिकास्थित आधारभूत अस्पताल लुंखुले स्थानीयबासीमा गरेकोे स्क्रिनिङमा नसर्ने रोगको संख्या विकराल पाइएको हो ।
नसर्ने रोग जस्तै मुटु रोग, मधुमेह, उच्च रक्तचाप, क्यान्सर, श्वासप्रश्वास सम्बन्धी आदि रोगहरु गाउँघरमा समेत उच्चदरले दिनप्रतिदिन बढ्दो अवस्थामा छन् । प्रदेश जनस्वास्थ्य कार्यालय पर्वतका स्वास्थ्य निरीक्षक प्रकाश गौतमका अनुसार महाशीलामा ३८७ पुरुष र २४७ जना महिला गरी ६२५ जनामा गरिएको स्क्रिनिङमा उच्च रक्तचापको समस्या देखिनेमा सिस्टालिक तर्फ १६४ जना र डायस्टोलिक तर्फ १७७ जना व्यक्ति रहेका छन् । मृगौला रोग परीक्षणमा २७ जनालाई समस्या देखिएको पाइएको छ भने मुटुनशा सम्वन्धी समस्या देखिनेको संख्या २११ रहेका छन् ।
सोही स्क्रिनिङमा २६ जनामा सुगरको विमार रहेको साथै एन्जाइटीको समस्या रहेका १६ जना र डिप्रेसनमा रहेका १४ जना भेटिएका थिए । स्वास्थ्य कार्यालयका अनुसार स्क्रिनिङ गर्ने व्यक्तिहरु नियमित औषधि सेवन गर्दै गरेका नभई पहिलो पटक कार्यक्रममा सहभागी भएका हुन् । स्क्रिनिङ कार्यक्रमको आयोजना प्रादेशिक स्वास्थ्य निर्देशनालयले गरेको थियो ।
प्रदेश जनस्वास्थ्य कार्यालय पर्वतका प्रमुख बद्रि आचार्यले पहिले भन्दा अहिले नसर्ने रोगको प्रकोप बढ्दो रहेको बताउनुहुन्छ । स्क्रिनिङले समयमै रोग पहिचान गरी जटिलता उत्पन्न नहुँदै रोग निदान गर्न सहयोग पुराउने प्रमुख आचार्यको भनाई छ ।
गाउँघरमै पनि अस्वस्थ खानपान र जीवनशैलीका कारण नसर्ने रोगको चपेटामा पर्नेको संख्या दिनप्रतिदिन बढ्दो रहेको छ । शारीरिक श्रम घटेको र मोबाइल, टेलिभिजन जस्ता डिजिटल माध्यमको अत्यधिक प्रयोगले मानिसहरुमा निस्कृय जीवनशैली बढेको छ भने चुरोट, खैनी, रक्सी जस्ता पदार्थको प्रयोग सामान्यजस्तै भएको छ ।