स्थानीय सरकारले निःशुल्क वितरण गर्ने औषधि खरीद प्रक्रिया समयमै अगाडि नबढाउदा कुश्मा नगरपालिकाभरका स्वास्थ्य संस्थामा औषधिको अभाव चर्किएको छ । स्थानीय सरकारले आर्थिक वर्षको सुरुवातमै खरीद प्रक्रिया अघि बढाउने भनिए पनि बजेट न्यून विनियोजन र प्रशासनिक ढिलाईले गर्दा स्वास्थ्य चौकीहरुमा आधारभूत औषधि समेत पाउन सकेका छैनन् ।
नगरपालिकाको वडा ३ स्थित दुर्लुङ स्वास्थ्य चौकीका प्रमुख सुरेश सुवेदीले सर्वसाधारण विरामीले पाउनु पर्ने ९८ प्रकारका औषधिमध्ये अति आवश्यकीय औषधिहरु नै विरामीलाई उपलब्ध गराउन नसकिएको गुनासो गर्नुभएको छ । स्वास्थ्य चौकी प्रमुख सुवेदीले भन्नुभयोर्–आर्थिक वर्षको असोज महिनामा टेण्डर सम्पन्न भई ढिलोमा पनि कार्तिक महिनासम्ममा खरीद भएको औषधि वितरण गर्न सक्नु पर्ने हो तर पालिकामा खरीदको अत्तोपत्तो छैन । विरामीलाई औषधि नदिई फिर्ता पठाउनु पर्ने अवस्था छ । औषधिकै अभावले गाउँको वर्थिङ सेन्टरमा बच्चा जन्माउनेको संख्या समेत घटेको छ । सुत्केरीहरुलाई सदरमुकामको अस्पतालमा रिफर गर्नु परेको छ ।’
पालिकाको वडा ७ मा रहेको चुवा स्वास्थ्य चौकीको प्रमुख गोपाल शर्माले पालिकाबाट निःशुल्क वितरण गर्ने औषधि समयमा नआएपछि सर्वसाधारणको माग अनुसार वडासँग समन्वय गरी केही अति आवश्यकीय औषधि खरीद गरेको बताउनुभयो । वडा ७ का का अध्यक्ष सुरेन्द्र केसीका अनुसार वडामा गरीव र आर्थिक विपन्न वर्गको दलितवस्ती रहेको र स्वास्थ्य सेवा दिनुको विकल्प नभएको हुँदा औषधि खरीदमा ३० हजार रकम विनियोजन गरी निःशुल्क वितरण गरिएको छ ।
औषधि अभावका कारण पालिका भित्र खासगरी ग्रामीण भेगका स्वास्थ्य चौकी बढी प्रभावित भएका छन् । पारासिटामोल, आइभि फ्लुड, एन्टिबायोटिक, सुई–सिरिन्ज जस्ता आधारभूत औषधि अभावले स्थानीयबासी निजी मेडिकलमा भर पर्न बाध्य छन् भने सामान्य उपचारका लागि सदरमुकामस्थित प्रदेश अस्पतालमा धाउनु परेको छ । गाउँका स्वास्थ्य संस्थामा निःशुल्क पाइनुपर्ने औषधि नपाउँदा आर्थिक रुपमा कमजोर बिरामीहरु निकै मर्कामा परेको स्थानीयबासीको दुःखेसो छ ।
नगरपालिकाको स्वास्थ्य शाखा प्रमुख यम प्रसाद शर्माले औषधि खरीद प्रक्रिया अगाडि बढेको बताउनुभयो । स्वास्थ्य प्रमुख शर्माले पालिकाको स्वास्थ्य क्षेत्रका लागि न्यून बजेट विनियोजन भएको कारण खरीद गरिने औषधि पनि भनेजति निःशुल्क वितरण गर्न नसक्ने अवस्था रहेको भनाई राख्नुभयो । पालिकालाई औषधि खरीदका लागि विनियोजन भई संघीय सरकारबाट सशर्त आएको रकम १४ लाख मात्रै छ भने पालिकाले औषधि खरीदका लागि बजेट विनियोजन गरेको छैन । पालिकाको स्वास्थ्य शाखाले खरीद प्रक्रिया अन्तिम चरणमा पुगेको र केही सातामै औषधि आपूर्ति सहज हुने दाबी गरे पनि स्पष्ट समयसीमा भने दिएको छैन ।