पर्वतको कुश्मा नगरपालिकाको शिवालय उच्च माविमा आइतवारको दिन अन्य दिन भन्दा फरक रौनक देखिन्थ्यो । पालिकामा सोमबारदेखि हुने राष्ट्रपति रनिङ शिल्ड खेलकुद प्रतियोगितामा कसरी उत्कृष्टता देखाउने भन्ने कुरामा विद्यार्थीहरुको चासो थियो ।
विद्यार्थीसँगै शिक्षकहरु समेतको ध्यान खेलकुद प्रतियोगितातर्फ केन्द्रित भैरहेको अवस्थामा वडा ६ मा रहेको विद्यालयमा केही अभिभावक सहित व्यवस्थापन समितिका पदाधिकारीहरुको आगमन हुन्छ । व्यवस्थापन समितिका अध्यक्षसहित आएको अभिभावक समूहले विद्यार्थीलाई खेलकुद सामग्री हस्तान्तरण गर्दछन् । खेलकुद प्रतियोगिताको तयारीमा लाग्दै गर्दा अकस्मात अभिभावकबाट खेलकुद पोशाक र अन्य खेलकुद सामग्री पाउदा विद्यार्थीहरु खुशीले दंग परेका थिए ।
राष्ट्रपति रनिङ शिल्ड खेल प्रतियोगिता अन्तर्गत भलिबलतर्फ भाग लिन लागेकी कक्षा १० की छात्रा खेलाडी जेनिशा कँडेलले भन्नुभयो–कुन रंग र कति मूल्यको खेलकुद पोशाक खरीद गर्ने भनी सोच्न नपाउदै हामीलाई माया गरेर अभिभावकले खेलकुद पोशाक उपलब्ध गराउनु भयो । अत्यन्तै खुशी र हौसला मिलेको छ ।’ खेलकुद पोशाक उपहार पाएपछि कक्षा ९ मा अध्ययरत छात्र कृष नेपालीले खेल खेल्न आफूलाई थप जोश र जाँगर मिलेको बताउनुभयो । छात्र नेपालीले दौड खेलमा प्रतिस्पर्धा गर्नु हुनेछ ।
विद्यालयबाट राष्ट्रपति रनिङ शिल्ड खेल प्रतियोगिताका विभिन्न विधामा सहभागी हुने ३० जना विद्यार्थीहरुलाई खेलकुद पोशाक उपलब्ध गराइएको र विद्यालयलाई आवश्यक पर्ने खेलकुद सामाग्री समेत अभिभावकबाट प्राप्त भएको विद्यालयका प्रअ गोविन्द पोख्रेलले उल्लेख गर्नुभयो । विद्यालय व्यवस्थापन समिति सल्लाहकार शंकर गिरीले विद्यार्थीहरुको शारीरिक र मानसिक विकासका लागि खेलकुद आवश्यक भएकाले सामग्री सहयोग उदाहरणीय रहेको बताउनुभयो । अभिभावकहरुको सहयोग र सद्भावले सामुदायिक विद्यालयको शैक्षिक गुणस्तर बढाउन कुनै न कुनै रुपमा सहयोग पुराउने सल्लाहकार गिरीको विश्वास छ ।
विद्यार्थीहरुलाई खेलकुद सामग्री सहयोग गर्नु भएका स्थानीय अभिभावक प्रसाद श्रेष्ठले भन्नुभयो –विद्यार्थीलाई सहयोग गर्न पाउदा अत्यन्तै खुशी लागेको छ ।’ खेलकुद सामग्री सहयोगमा सहजीकरण गर्नुभएका मिलन क्लवका अध्यक्ष झलक कार्कीले भन्नुभयो–विद्यार्थीहरु किताब–कपीमा मात्र होइन, खेलकुदमा पनि सक्षम बन्नुपर्छ भन्ने सोचका साथ हामीले यो पहल गरेका हौं । सहयोगले अझ बढी आर्थिक विपन्न परिवारका विद्यार्थीलाई खुशी मिलेको छ ।’