पर्यटकीय गन्तव्य मानिदै गएको पर्वत जिल्लामा आन्तरिक तथा बाह्य पर्यटकको आगमन बढेसँगै होटल व्यवसाय स्थापना गर्ने लहर चलेको छ । होटल व्यवसाय स्थापना र संचालन गर्नेमा केही वर्ष अघिदेखि धेरैजसो युवापुस्ता नै देखिन्छन् । उसो त जिल्लाबाट अध्ययन र रोजीरोटीका खातिर विदेश भासिने युवाहरुको संख्या समेत उल्लेख्य छ ।
आफ्नै माटोमा केही गर्नुपर्छ भनी कम्मर कसेर लाग्ने केही सकृय होटल व्यवसायी युवाहरुमध्ये कविन्द्र केसीको नाम अग्रपंक्तिमै आउँछ । जिल्लाको कुश्मा नगरपालिका वडा ५ बन्जी जम्प साइट नेर ड्राइगन होटल एण्ड रेष्टुरेन्ट संचालन गर्दै आएका ३८ वर्षे युवा केसी सामाजिक कार्यमा समेत सकृय रहनुहुन्छ । स्कुले जीवनमा बाबुआमाले खाजा खान दिएको सानो रकम संकलन गरी दिनदुःखी र असहायको सेवामा खर्चिने युवा केसीको बाल्यकालिन स्वभावले कहिल्यै छाडेन । युवा व्यवसायी केसी भन्नुहुन्छ–सामाजिक सेवाले आत्मसन्तुष्टि दिन्छ । अर्कोको दुःखमा सानो भए पनि मलम बन्न पाउदाको क्षण गजबको खुशी मिल्छ ।’
व्यवसायी केसी केवल पैसाकै पछि दगुर्ने व्यक्ति हैन भन्ने कुरा उनको सामाजिक कर्ममा रहेको सक्रियताले देखाउँछ । जिल्लामा क्रियाशील एकता युवा क्लवको नेतृत्वमा रहेर सामाजिक सेवाका क्षेत्रमा काम गर्दै आउनु भएका युवा केसीले कुनैबेला लाहुरे बन्ने सपना मनमा लिएर हिडेको बताउनु हुन्छ । लाहुरे बन्न नसकेपछि धेरै साथीभाई विदेश गएको देख्दा उनलाई पनि विदेश जाने रहर पलाउँछ । विदेश जापान जाने रहर पालेका युवा केसी ठग दलालको फन्दामा परेर करीव १८ लाख रुपैया डुवाउँछन् । त्यो रकम अझै फिर्ता पाउन नसकेका युवा केसीलाई विदेश जाने सपना पाल्दा मिलेको चोटले अझै झस्काइरहेको छ ।
आफ्नो लाहुरे बन्ने सानैदेखिको सपना विफल हुनु र विदेश जान खोज्दा बाउआमाले दुःख गरी कमाएको लाखौ रकम डुब्न पुगेपछि युवा केसीलाई कता कता निराशामा पुराएको थियो । सानैमा बुबा होम बहादुर खत्रीलाई गुमाउन परे पनि केसीलाई आमा खिमा कुमारीको स्नेह, साथसहयोग र हौसलाले सधै आशावादी बनाउन सहयोग पुराइ रहेको छ ।

निराशामै रुमलिन छोडेर हिम्मत र आँट लिएर युवा केसीले आफ्नै माटोमा केही गर्ने हुटहुटी मनमा लिनुभयो । केही फरक तरीकाले सेवा दिने सोचले नै युवा केसीले होटलबाट सेवाग्राहीलाई रैथाने स्वाद पस्किन सफल हुनुभएको छ । होटल व्यवसायको सेवा र आम्दानीबाट सन्तुष्ट युवा केसी काम गर्नकै लागि विदेश जाने कुरा सोच्न पनि चाहनु हुँदैन ।
एक श्रीमति र दुई सन्तानका पिता केसीले होटल व्यवसाय संचालन गर्न थालेको पनि ५ वर्ष बढी भैसक्यो । सेवाग्राहीको सन्तुष्टि नै पहिलो प्राथमिकता रहेको केसीको होटलमा लाखौ रकम लगानी भैइसकेको छ । पहिले आफ्नै पैतृक घरबाट दुई दाजुभाई सुरेश केसी र कविन्द्र केसीले सुरुवात गरेको होटल व्यवसाय अहिले दुई स्थानबाट संचालनमा आएको छ । व्यवसाय प्रतिको दृढ लगाव र मिहिनेतका कारण केसी दाजुभाईका होटलहरु सेवाग्राहीको पहिलो रोजाईमा पर्ने गरेका छन् । युवा केसीलाई होटल व्यवसायमा भ्याईनभ्याई छ तर बाँकी रहेको समयलाई सामाजिक सेवामा लगाउनुले उहाँको सामाजिक भावना छताछुल्ल देखिन्छ ।
युवा केसी एकता क्लवमा २०६४ सालदेखि सकृय सदस्य हुँदै यसै वर्ष अध्यक्षको भूमिकामा हुनुहुन्छ । एकता क्लव मार्फत् थुप्रै सामाजिक गतिविधिहरु हुँदै आएका छन् । क्लवले २०६४ देखि नै दाजुभाई नभएका दिदीवैनीसहित सवै दिदीवैनीहरुलाई एकसूत्रमा बाँधेर हरितालिका तीजको अवसरमा दर खुवाउने गरी संस्कृतिको जगेर्ना गर्दै आएको छ ।
युवा केसीको सकृय पहलमा एकता युवा क्लवले क्यान्सर पीडित, मृगौला पिडित, दीनदुःखी र असहायहरुलाई सवैको सहयोग जुटाएर आर्थिक तथा भौतिक सहयोग गर्दछ । भूकम्प पीडित साथै दैवीप्रकोपमा परेका मानिसहरुलाई क्लवले पुराएको आर्थिक र भौतिक सहयोगमा युवा केसीको योगदान स्मरणीय छ । क्लवले रक्तदान कार्यक्रम गर्ने साथै विद्यालयमा शैक्षिक सामाग्री वितरण, बजारको सौन्दर्यकरण र ग्रिनसिटी कार्यक्रम मार्फत् समाजमा योगदान पुराएको छ ।
होटलमा ४ देखि ६ जना सम्म युवाहरुलाई रोजगारी दिदै आएका युवा व्यवसायी केसीले समय मिलेसम्म र भ्याएसम्म आफै नै विभिन्न परिकारका स्वादिष्ट अर्गानिक खानेकुराहरु तयार पारेर ग्राहकलाई सेवा पुराउने बताउनु हुन्छ । युवा केसी भन्नुहुन्छ–धेरै टाढा टाढाबाट समेत ड्राइगन होटल सम्झिएर आउनु हुने ग्राहकलाई मिठो भोजन आफ्नै हातले बनाएर खुवाउन पाउँदाको खुशी बेग्लै हुन्छ । धेरैजसो ग्राहकले मेरो हातको खाना नै मन पर्छ भन्नुहुन्छ । यस्तो सुन्दा झनै खुशी लाग्छ ।’