आजको समाज सूचना प्रवाहको अत्यन्तै तीव्र छ । सामाजिक सञ्जाल, डिजिटल मिडिया र प्राविधिको विस्तारसँगै मानिसहरु निरन्तर जोडिएको अवस्थामा छन् । तर विडम्वना, सार्थक संवाद र गम्भीर अन्तरक्रियाको संस्कृति पर्वत जिल्लामा कमजोर हुँदै गएको देखिन्छ ।
पर्वतमा सम्भवतः धेरै समयपछि गैसस महासंघ नेपाल पर्वत र नागरिक संजाल पर्वतको पहलमा वृहत ढंगले सुशासन, भ्रष्टचार विरुद्धका प्रयास, निर्वाचन प्रक्रिया तथा राजनीतिक र शासन प्रणाली विषयक पुस्ता–अन्तर संवादको आयोजना गरियो । सदरमुकाम कुश्मामा यहीँ पौष मंगलबार भएको संवाद कार्यक्रममा नागरिक समाजका अगुवा, सामाजिक संघसंस्थामका प्रतिनिधि, राजनीतिक दलका प्रतिनिधि, पत्रकार, सामाजिक अभियान्ता साथै जेन्जी युवा पुस्ता लगायतको सक्रिय सहभागीता रहेको थियो ।
जिल्लामा समसामयिक विषयमा हुने बहस, अन्तर–संवादको अभाव समाजका लागि दीर्घकालीन चुनौती बन्दी गएको अवस्थामा युवा पुस्ता माझ संवाद हुनु सकारात्मक सन्देश रहेको नेकपा पार्टीका युवा नेता शंकर गिरी बताउनुहुन्छ । पछिल्लो समय प्रदेश अस्पताल कुश्माको स्वास्थ्य सेवा सुधार र प्रवद्र्धनमा उल्लेखनीय योगदान खेल्नु भएका युवा नेता गिरीको विचारमा राजनीति, अर्थतन्त्र, शिक्षा, रोजगारी, वातावरण, प्रविधि वा सामाजिक न्यायजस्ता विषयमा खुला बहस बिना सचेत नागरिक निर्माण सम्भव हुँदैन ।
जेष्ठ पुस्तासँग इतिहासको अनुभव, राजनीतिक चेतना र सामाजिक संघर्षको स्मृति छ भने नयाँ पुस्तासँग नवीन सोच, प्रविधिमैत्री क्षमता र परिवर्तनको आकांक्षा छ । दुई पुस्ताबीच संवाद नहुँदा एकातिर अनुभव उपेक्षित हुन्छ भने अर्कोतिर उर्जा दिशाहीन बन्छ । जसका कारण जेन्जी विद्रोहको रापतापको सामना देश र समाजले गर्नुपर्ने अवस्था आउने गर्छ ।
संवाद कार्यक्रममा जेन्जी पुस्ताका प्रतिनिधि मदन पौडेलले जेन्जी विद्रोह भ्रष्टचारका विरुद्ध सुशासनका खातिर गर्नु परेको भनाई राख्नु भएको थियो । संवादमा सहभागी भएका नेपाली कांग्रेस पर्वतका प्रवक्ता अच्युत तिवारीले भ्रष्टचारको जालो यत्रतत्र फैलिएको र सो जालो तोड्नका लागि नागरिक संजालसँग आवद्ध व्यक्तिले कुनै राजनीतिक पार्टीको विचार भन्दा माथि उठेर सुशासनका लागि काम गर्नसक्नु पर्ने धारणा राख्नु भयो ।
नेकपा एमाले कुश्मा नगर कमिटि अध्यक्ष युवा नेता किशोर सापकोटाले एमाले पार्टीले आफ्नो पार्टी सुशासन स्थापना गर्न लागिपरेको उल्लेख गर्दै राजनीतिमा उमेर भन्दा पनि विचार र क्षमताको खास महत्व राख्ने बताउनुभयो । कार्यक्रममा गैसस महासंघ नेपालका निवर्तमान अध्यक्ष रामप्रसाद सुवेदीले जेन्जी आन्दोलनको समर्थन गर्दै देशमा कुरा र भाषण भन्दा पनि काम हुनुपर्नेमा जोड दिनुभयो । निवर्तमान अध्यक्ष सुवेदीले संसद पुर्नस्थापना गरी संविधान सच्याई जेन्जी पुस्ताको भावना समेटेर मात्रै चुनावमा जान सकेमा मुलुकले परिवर्तनको आभास पाउन सक्ने धारणा राख्नुभयो ।
गैसस महासंघ नेपालका केन्द्रिय सदस्य शिवप्रसाद शर्माले अन्तर–संवाद कार्यक्रममा सहजिकरण गरेको कार्यक्रममा नागरिक संजाल पर्वतकी संयोजक माया अधिकारीको समेत सहभागीता थियो ।