पर्वतको ज्योतिष गाउँ भनेर चिनिदै आएको पाङका दुई दाजुभाई गाईभैसी पालन र केरा खेतीमा व्यावसायिक रुपमा लागेका छन् । उमेरले तीन दशक टेक्दै गरेका रामकृष्ण दास वैरागी र नारायणदास वैरागीले विगत ५ वर्षदेखि गाउँघरमै कृषि पेशाबाट भविष्य चम्काउदै छन् ।
कुश्मा नगरपालिका वडा १ मा रहेको टार वैरागीथरका कृषक दाजुभाईहरु दुवै जना काठमाण्डौमा पढेर गाउँ फर्किएका युवाहरु हुन् । उमेरले ३४ वर्षे रामकृष्णदास व्यवस्थापन विषयमा स्नातक उत्तिर्ण छन् भने ३२ वर्षे नारायणदास पढेलेखेका युवाहरु हुन् । शंकरदेव क्याम्पसबाट स्नातक उत्तिर्ण गरेका रामकृष्णदास जागिर गर्ने र विदेश जाने भन्ने चक्करतिर नलागेर मुलुकमै केही गर्ने सोचमा लागे । केही समयको खोजी र अध्ययनपछि गाउँमै केही गर्नुपर्छ भन्ने सोच राखेका रामकृष्णदासले गाईभैसी पालनसँगै केराखेती व्यवसायमा संम्भावना देखे । वैरागी दाजुभाईले गाईभैसी पालनमा ३५ लाख र केराखेतीमा १ करोड गरी जम्मा १ करोड ३५ लगानी गरिसकेका छन् ।
दाजु रामकृष्णदास गाउँमै कृषि पेशा अंगालेर रमाउदै थिए । काठमाडौमा विएस्सी अध्ययनरत रहेका भाई नारायणदासको मनमा पनि पढेर टप गर्न नसक्ने भएपछि सामान्य तवरले पास गर्न तिर लाग्नु भन्दा गाउँ फर्किएर दाजुसँगै कृषि पेशामा नै लाग्न मनले उचित ठान्यो । दुई दाजुभाई नै खेतीपातीमा लागेपछि व्यवसाय विस्तारमा थप सहज भयो । वैरागी दाजुभाईले आफ्नो २० रोपनी र भाडामा लिएको छिमेकीको १ सय ३० रोपनी गरी डेढ सय रोपनी जग्गामा केरा खेती विस्तार गरेका छन् । उनीहरुले वैरागी मल्टिप्रपोज कम्पनि प्रा.लि.मार्फत् व्यवसायिक गाईभैसी पालन र केरा खेती गरेका छन् ।
वैरागी दाजुभाईले आफ्नो फर्ममा गाई र भैसी गरी २४ वटा पशुपालन गरेका छन् । विहान ३ बजेदेखि गाईगोठको काम शुरु हुन्छ । गाईभैसीको गरी दैनिक २ सय लिटर दुध उत्पादन हुने गर्दछ । कृषक रामकृष्णदास भन्नुहुन्छ–ू दुध र केराको बजारको कुनै समस्या छैन । बाग्लुङ र कुश्मा बजारमा रहेका उपभोक्ताहरुको घरमा नै हामी आफैले दुध पुराउछौ । उपभोक्ताहरु पनि खुशी हुनुहुन्छ । लोकल हजारी जातको केरा मिठो स्वादिष्ट छ । अर्गानिक लोकल जातको केरा विक्री गर्न कुनै समस्या छैन ।ू
अघिल्लो वर्ष सवै खर्च कटाएर दुध विक्रीबाट मात्रै १८ लाख वचत गरेको कृषक नारायण दासले बताउनुभयो । वैरागी दाजुभाईले केरा खेतीबाट समेत आम्दानी गर्न थालेका छन् ।  केरा खेतीबाट मासिक डेढ लाख कमाइ गर्ने लक्ष्य रहेको बैरागी दाजुभाईको भनाई छ । केराको घारी काटेपछि रहेको केराको थाम र पातहरु धानको परालमा मिलाएर गाईभैसीलाई खानाको रुपमा खुलाउदा खर्च कम आउने गरेको छ । केरा खेतीका लागि आफ्नै गाईभसी पालनका कारण मल प्रयोग गर्न सजिलो भएको छ ।
गाईभैसी पालन र केराखेतीबाट मनग्य आम्दानी गर्न सफल वैरागी दाजुभाई दुवै जना खुशी छन् । गाईभैसीको संख्या थप गर्ने र केराको थामबाट रेशा उत्पादन गर्ने उद्यम तिर आगामि दिनमा लाग्ने सोच रहेको कृषक वैरागी दाजुभाईले बताउनुभयो ।