आगामी निर्वाचनलाई लक्षित गर्दै पर्वत जिल्लामा उम्मेदवारबिच सार्वजनिक बहस आयोजना गर्नुपर्ने माग तीव्र बन्दै गएता पनि पहलकदमी भने हुन सकेको छैन । मध्यावधि निर्वाचनको मिति अब ८ दिन मात्रै बाँकी हुँदा पनि प्रतिनिधिसभा सदस्यका उम्मेवारबिच सार्वजनिक बहसका लागि ठोस पहलकदमी हुन सकेको छैन ।
कुल क्षेत्रफल ४९४ वर्ग किलोमिटर रहेको पर्वत भौगोलिक रुपमा सानो भएपनि सम्भावना र चुनौती दुवै बोकेको जिल्ला हो । प्राकृतिक स्रोत, पर्यटन र कृषि सम्भावना उच्च भए पनि दीर्घकालीन विकासका लागि ठोस नीति र कार्यान्वयन आवश्यक देखिन्छ । यसै कारण पनि पहिलो पटक औपचारिक रुपमा उम्मेदवारबीच प्रत्यक्ष बहस गरिनुपर्ने विषयमा नागरिक समाज, युवाहरु र विभिन्न पेशागत संस्थाहरुबीच व्यापक माग भएको हो ।
सामाजिक सञ्जालदेखि चिया पसल र सार्वजनिक कार्यक्रमसम्म उम्मेदवारले आफ्नो चुनावी प्रतिवद्धता खुला रुपमा राखून भन्ने आवाज उठ्न थालेको छ । मतदाताले घोषणापत्रभन्दा बाहिर गएर उम्मेदवारको दृष्टिकोण, योजना र प्रतिवद्धता प्रत्यक्ष सुन्न पाउने अवसर आवश्यक रहेको पर्वत पर्यटन प्रवद्र्धन केन्द्रका संस्थापक अध्यक्ष शिवप्रसाद शर्माको भनाई छ ।
पर्वत उद्योग वाणिज्य संघ, प्रेस संगठनहरु तथा विभिन्न सामाजिक युवा क्लवहरुले संयुक्त रुपमा बहस कार्यक्रम आयोजना गर्ने सम्भावनाबारे छलफल अघि बढाएको बताएका छन् । उद्योग वाणिज्य संघ पर्वतका पूर्व अध्यक्ष हरिओम शर्मा लामिछानेका अनुसार विकास, रोजगारी, शिक्षा, स्वास्थ्य, कृषि, पूर्वाधार र सुशासनजस्ता विषयमा स्पष्ट धारणा सार्वजनिक गर्न उम्मेदवारहरुलाई एउटै मञ्चमा ल्याउनु अहिलेको आवश्यकता हो । पूर्व अध्यक्ष लामिछानेले बहसका लागि उम्मेदवारहरुसँग कुराकानी भएको र उम्मेदवारहरुको कार्य व्यस्तता मिलाएर बहस गरिने बताउनुभयो ।
जिल्लाबाट प्रतिनिधिसभाका लागि आकांक्षी उम्मेदवारहरु पनि बहसका पक्षमा देखिएका छन् । नेपाली कम्युनिष्ट पार्टीका प्रतिनिधिसभा उम्मेदवार मनहरि तिमिल्सिना र उज्यालो नेपाल पार्टी पर्वतका उम्मेदवार नविन चोचाङ्गी लगायत केहीले औपचारिक निमन्त्रणा आएमा सहभागी हुन तयार रहेको बताएका छन् ।
नेकपा एमालेका उम्मेदवार पदम गिरी र नेपाली काँग्रेसका उम्मेदवार अर्जुृृन प्रसाद जोशीले दुई दिन पहिले चुनावी प्रतिवद्धता सार्वजनिक गरेका छन् । बाँकीले चुनावी प्रतिवद्धता समेत सार्वजनिक गर्न सकेका छैनन् । प्रतिस्पर्धी राजनीतिक दलका उम्मेदवारहरुले चुनावी प्रतिवद्धता सार्वजनिक गरेसँगै सार्वजनिक संवादका लागि थप सहजता बनेको सरोकारवाला पक्षको बुझाई छ ।
जिल्लामा भ्रष्टचार विरुद्ध र सुशासनका लागि आवाज उठाउदै आएको जेन्जी सहितका युवाहरु संलग्न संस्था पर्वत युवा सञ्जालका सचिव मदन पौडेलले सार्वजनिक बहस अत्यन्तै आवश्यक रहेकोले पहल गर्दै गरेको बताउनुभयो । नेपाली कम्युनिष्ट पार्टीका युवा नेता तथा प्रदेश अस्पताल कुश्मा पर्वतका निर्वतमान अध्यक्ष शंकर गिरीको मत पनि उम्मेदवारबिच सार्वजनिक बहस हुनु लोकतान्त्रिक व्यवस्थाको सुन्दर पक्ष हुने औल्याउनु हुन्छ । उम्मेदवारले जिल्लाको समग्र विकासका लागि कस्तो परिकल्पना र अवधारणा लिएका छन् भन्ने कुरा सार्वजनिक बहसले जनतालाई सूसुचित हुने अवसर प्रदान गर्ने युवा नेता गिरीको दाबी छ ।
होटल व्यवसायी संघ पर्वतका अध्यक्ष कृष्णप्रसाद श्रेष्ठले उम्मेदवारहरुबिच बहस हुनुपर्छ भन्ने धारणा राख्दै भन्नुहुन्छर्–युवा पलायन पर्वत जिल्लाको गम्भीर समस्या हो । कृषि, पर्यटन, जलविद्युत, जडीबुटी र साना उद्यममा प्रशस्त सम्भावना हँुदाहुदै पनि नीति र लगानीको कमी देखिन्छ । जिल्लामा पर्यटनको संभावना भए पनि पर्यटन प्रवद्र्धनका लागि अति आवश्यक पर्यटन सूचना केन्द्र स्थापनाको पहल कहिकतैबाट भएको छैन । त्यसैले संसदमा जाने प्रतिनिधिले युवामुखी, रोजगारमुखी र दीर्घकालीन विकास दृष्टि बोकेको हुनुपर्छ । तत्कालीन लोकप्रियताभन्दा भविष्य निर्माणमा केन्द्रित भिजन, सोच र अवधारणाको विशेषता हुनुपर्छ भन्नका लागि बहसको खाँचो छ ।’
पर्वतेली जनता पर्वतबाट जाने प्रतिनिधि भाषणमा सीमित नभई परिणाम निकाल्न सक्ने, जिल्लाको पक्षमा दृढतापूर्वक उभिन सक्ने र जनताप्रति उत्तरदायी भएको देख्न चाहन्छन् । जनताको भावना र मर्म बुझ्ने सांसदले मात्र पर्वत जिल्लाको समग्र विकास र पहिचानलाई राष्ट्रियस्तरमा स्थापित गर्न सक्छ भन्ने आमपर्वतेलीको धारणा रहेको छ ।