सुशासन स्थापना र भ्रष्टचार विरुद्ध गरिएको विद्यार्थीको आन्दोलनको रुप जेन्जी विद्रोहमा बदलिन्छ भन्ने सोच कसैमा थिएन । जेन्जी विद्रोहले दुईतिहाईको बलमा गठित ओली सरकार भताभुंग हुने आंकलन समेत कसैको थिएन ।
जेन्जी विद्रोहका कारण संसद भंग भयोे । प्रतिनिधिसभा विघटनपछि सम्पन्न भएको २०८२ साल फागुन २१ को मध्यावधि निर्वाचन अघिल्ला आमनिर्वाचनहरुको तुलनामा केही फरक विशेषतासहित सम्पन्न भएको छ । संंविधान अनुसार नियमित रुपमा हुने आमनिर्वाचनभन्दा यसपटकको निर्वाचन राजनीतिक परिस्थितिका कारण समयअघि नै आयोजना गरिएको हो ।
अघिल्ला आमनिर्वाचनहरुमा दलहरुले दीर्घकालीन नीति तथा कार्यक्रमलाई प्राथमिकतामा राखेर चुनावी प्रचारप्रसार गर्ने गरेका थिए । तर मध्यावधि निर्वाचनामा सुशासन र भ्रष्टचारकै विषयलाई चुनावी बहसका मुख्य मुद्धा बनेका छन् । यसपटकको निर्वाचनमा उम्मेदवार चयन, गठबन्धको स्वरुप र प्रचारप्रसारशैलीमा पनि परिवर्तन देखिएको छ ।
संसदीय चुनाव खर्चिलो र भड्किलो भयो भन्ने राजनीतिक पार्टी पंक्तिमा रहदै आएकोमा यसपाली त्यसो भएन । यदि कहिकतै गरिएको भएपनि जनताले रुचाएनन् । कहिकतै मासुभात र केही पैसा हातमा लिएपनि मत भने आफ्नो इच्छा अनुसार नै राखेको मत परिणामले देखाउँछ । यसपाली मत विक्री भएन भन्न सकिन्छ । योग्य र इमान्दार अनि जनताको मन जितेको उम्मेदवारले जनताको तन, मन र धन सवै साथसहयोग पाउने रहिछ भन्ने समेत यो निर्वाचनले छर्लङ्ग पारिदिएको छ । म्याग्दीबाट स्वतन्त्र उम्मेदवार उठेर जित हासिल गरेका महाविर पुन यसका असली उदाहरण हुन् ।
कतिपय स्थानमा नयाँ अनुहार र स्वतन्त्र उम्मेदवारको उपस्थिति उल्लेखनीय देखिएको छ भने सामाजिक सञ्जालमार्फत् चुनावी प्रचार झन् सक्रिय भएको छ । राजनीतिमा नयाँ अनुहारहरु जो विषयगत विज्ञता र ज्ञान भएका शिक्षित युवापंक्ति उल्लेख्य सहभागीताले भोलि नेपालको नीतिनिर्माणमा नयाँ युगचेतसहितका व्यक्तित्वहरुकै वर्चस्व रहने आंकलन गर्न सकिन्छ । नेपाली जनता चर्को भाषण र गालीगलौजलाई पत्याउन छोडेर राजनीतिक ऐजेण्डा र मुद्धा केन्द्रित रहेको पाइयो । आमसर्वसाधारण मतदाताको रोजाईमा उम्मेदवारमध्ये पनि असल, इमान्दार, कर्मशील युवाहरु परे । पटकपटक संसद र मन्त्री भई परीक्षण भइसकेका अधिकांश उम्मेदवारहरु जनताको रोजाईमा परेनन् ।
निर्वाचन पर्यवक्षकहरुका अनुसार मध्यावधि निर्वाचनले राजनीतिक स्थायित्वको प्रश्नलाई पनि केन्द्रमा ल्याएको छ । समानुपातिक चुनावी प्रणालीका कारण एकल बहुमत आउन सक्दैन भन्ने भाष्य समेत यसपालि राष्ट्रिय स्वतन्त्र पार्टीले प्राप्त गरेको प्रत्यक्ष तथा समानुपातिक मतको प्राप्तिले तोडिदिएको छ । रास्वपाले एकल बहुमतको सरकार निर्माण गर्दैछ ।
यसपटकको मध्यावधि निर्वाचन अघिल्ला आमनिर्वाचनभन्दा समय, कारण, राजनीतिक परिवेश र चुनावी मुद्धाका हिसाबले फरक विशेषता बोकेको र नयाँ अभ्यासतिर लम्किएको देखिन्छ । अहिलेको चुनावी नतिजाले के देखाउँछ भने जनता अब नेताबाट पढ्ने भन्दा बढी नेतालाई पाठ पढाउने भइसकेका छन् ।